Pensarnos futuros sustentables é neste 2025 o lema da Semana CREA, o programa de actividades abertas a toda a cidadanía que busca servir como escaparate do proxecto de especialización do campus pontevedrés. Promovida polo Campus Crea co apoio da Deputación de Pontevedra, esta nova edición da Semana da Creatividade desenvolverase entre o 21 e 25 de abril, coa participación entre outros, do considerado mellor creativo publicitario español do século XX, Toni Segarra, da investigadora e deseñadora de moda Elisa Palomino ou do artista gráfico Bruno de Almeida. A moda sustentable, a creación artística con materiais de refugallo ou o deseño colaborativo son algunhas das temáticas na que porá o foco unha programación na que se insiren tamén catro obradoiros, así como un ciclo de cine que botará a andar este venres na sede da Vicerreitoría.
Como explica a directora de área do Campus de Especialización Crea, Ana Belén Fernández Souto, trátase dunha programación que aborda “a creatividade nun sentido interdisciplinar e transdisciplinar” e que busca servir como “un escaparate do que é o Campus Crea”, no marco dos traballos para acadar a súa acreditación. Unha das novidades desta edición, engade, é o obxectivo de que esta Semana CREA teña cada ano “un eixe temático”, como sería neste caso a sustentabilidade, á vez que estean reflectidos nesta programación os diferentes ámbitos do Campus Crea.
Moda, deseño ou creatividade publicitaria
Nesta programación insírense conferencias como a que o martes 22 permitirá afondar, na Facultade de Belas Artes, na traxectoria profesional da deseñadora e investigadora da University of Arts de Londres Elisa Palomino, quen traballou durante máis de 25 anos para firmas como John Galliano ou Dior e que actualmente centra a súa carreira profesional na docencia e investigación en moda, antropoloxía e sostibilidade. O mércores 23, esta centro acollerá tamén un relatorio do artista e profesor da Universidad de Salamanca Carlos Rodríguez-Méndez, mentres no Museo de Pontevedra terá lugar a mesa Deseño e sociedade: inclusión e sociedade, na que intervirán as deseñadoras gráficas Raquel Boo e Zeltia Iglesias, xunto coa profesora Silvia García.
Promovida coa colaboración de Creatividade Galega, o Museo acollerá o xoves 24 a mesa Isto é un colexio, que reunirá dúas das principais figuras da industria publicitaria en España, Toni Segarra e David Caballero, nun coloquio conducido por Julián Abad, presidente de Creatividade Galega. Director creativo de Alegre & Roca, Segarra foi nomeado pola revista Anuncios como mellor creativo español do século XX e no ano 2016 Forbes situouno entre as 25 persoas máis influentes de España. Non en van, a súa traxectoria no sector publicitario levouno a acadar 39 leóns no Festival de Cannes, entre eles un dos dous únicos grandes premios logrados por unha axencia española, ou máis de 100 soles no Festival de San Sebastián. Nesta xornada, Segarra compartirá conversa director xeral creativo de VML The Cocktail David Caballero, cuxos traballos foron premiados internacionalmente en festivais como Cannes, D&AS, The One Show, The New Your Festival ou WARC.
Xa o venres 24, a sustentabilidade aplicada ao sector téxtil será o eixe da conferencia que impartirá na Facultade de Deseño Manuel Heredia, director de Sods Estudio, quen falará das “claves para a creación de negocios téxtiles sustentables”, como destacan desde a organización desta Semana CREA.
Catro obradoiros abertos á cidadanía
Desta programación forman parte tamén catro obradoiros abertos á cidadanía, que manteñen aberta a súa inscrición ata cubrir prazas, no correo xes.crea@uvigo.gal. Un deles, Crea o teu propio libro bordado, abrirá a programación desta semana. Impartido pola artista gráfica Maritza Berttollini, permitirá iniciarse na creación dun libro téxtil a través do bordado e do colaxe e terá lugar o luns 21 e mércores 23 na sede da Vicerreitoría.
O martes 22, Belas Artes acollerá o taller Design Colaborativo. Coexistencia e Sustentabilidade, a cargo de Bruno de Almeida. Recentemente seleccionado para deseñar a identidade visual da Feira do Libro de Boloña, o traballo deste artista gráfico reflexiona, partindo da ilustración, “sobre as ecoloxías ambientais e sociais”. Tamén o martes, Deseño acollerá o primeira sesión do obradoiro Materiais sustentables, tradición versus greenwashing, impartido por Elisa Palomino, e botará a andar o taller Las hierbas que el arrojó, na sede da asociación Kentada. Á fronte desta actividade atópanse os investigadores da Facultade de Belas Artes Julio Catalán, Álex Fuertes e Andrea Otero, cuxo traballo artístico “céntrase na recollida e reemprego de materiais de refugallo”, o que será tamén o punto de partida dunha actividade na que as persoas participantes crearán obras con elementos atopados, dando lugar á exposición que se inaugurará neste espazo o venres 25 e que servirá tamén para a clausura desta programación.
Noticia completa: DUVI