Dous investigadores predoutorais da Facultade de Belas Artes, Carlos Fer e Andrea Davila, son os gañadores do Certame de Residencias Artísticas Novos Valores do Museo de Pontevedra, o que lles permitira desenvolver os seus proxectos artísticos nas estadías que levarán a cabo na Fundación Nicole & Walter Leblanc de Bruxelas e no Centro de Residencias Artísticas Matadero de Madrid. Investigadora do grupo Prace, Davila centrará o seu proxecto na interrelación do corpo humano coa contorna, mentres que Carlos Fer, integrante do grupo dx5, buscará afondar na idea da “antipintura”. As obras xurdidas destas residencias exhibiranse este verán no marco da programación da 32ª edición da Bienal de Pontevedra.
O vicepresidente da Deputación de Pontevedra, Rafael Domínguez, e a directora do Museo, Ángeles Tilve, presentaron este venres o resultado desta convocatoria, resultado da “nova orientación” do certame Novos Valores, que pasa de premiar unha obra a outorgar a oportunidade aos dous artistas que “presentaron o mellor proxecto” de participar nunhas residencias que suporán “unha experiencia vital e artística fundamental”, á vez que nos sitúa “na vangarda europea da arte”, salientou Domínguez. O acto contou coa participación por videoconferencia de Luisa Espino, responsable de Matadero, un espazo “dedicado exclusivamente a residencias artísticas” de múltiples disciplinas dependente do Ayuntamiento de Madrid, e de María Inés Rodríguez, directora da Fundación Nicole & Walter Leblanc, que leva a cabo un programa de residencias para que novas e novos artistas acheguen outras olladas ao legado de Walter Leblanc a partir do seu traballo cos arquivos deste artista cinético e conceptual.
Tanto Fer, a partir da vindeira semana, como Davila, no mes de abril, comezarán os seus proxectos en Bruxelas, para logo completalos en Matadero e ambos contarán coa bolsa de 9500 euros para o desenvolvemento das súas estadías.
‘Exercicios para colgar unha pintura’
Alumno do doutoramento en Creación e Investigación en Arte Contemporánea, Carlos Fer definiu este certame como “unha oportunidade única para o desenvolvemento da nosa práctica artística e investigadora”, que fai posible “a conexión con dúas importantes institucións”, ademais de “poder expor o proxecto final na Bienal”. Inserido na investigación sobre “as formas de colgar unha pintura” que leva a cabo no marco da súa tese, Fer foi seleccionado polo proxecto Exercicios para colgar unha pintura, “no que visualizo unha instalación que amosa as diversas maneiras imposibles nas que unha pintura se pode crear, gardar, pintar, mostrar, colgar, deixar ser ou deixar cair”, coa que busca aludir “aos efectos dominó e bolboreta, nos que unha acción desemboca irremediablemente nunha serie de sucesos que xeran outros”, destaca. Sustentada nese senso na idea da “antipintura”, Fer destacou o interesante de poder traballar cos arquivos dun artista conectado con esta idea como Walter Leblanc
“Corpos de auga” que constrúen un novo imaxinario
Tamén estudante de doutoramento, Davila xa fora galardoada no certame Novos Valores en 2020, á vez que foi tamén gañadora o pasado ano dunha residencia de investigación na Academia de Arte e Deseño de Basilea, convocada a través do Museo. Nas súas estadías en Bruxelas e Madrid, esta artista e investigadora levará a cabo o seu proxecto The body is earth, which becomes garden at the touch of water, que iniciou anos atrás no marco dunha residencia en Atelier Mondial, en colaboración co Institute Art Gende Nature, de Basilea. Este proxecto ten como punto de partida o seu interese “pola fenomenoloxía do corpo”, por como este “poder ser mediador coa contorna e con outros corpos”, sinalou. En concreto, Davila buscará afondar nesa interrelación entre o corpo humano e a contorna desde a perspectiva dun “poshumanismo feminista”, incidindo en como “pensarnos como corpos de auga pode axudarnos a construír un imaxinario que nos achegue máis a tratar cuestións ecolóxicas” e a abordar “outras formas de ser e estar”.
Noticia completa: DUVI