A Sala Universitaria Profesor Manuel Moldes inaugura o vindeiro xoves 13 de marzo Bar-Cafetería. Grazas pola súa visita, unha exposición que reúne as obras de Alberto Ardid, Tayone e o colectivo Rapapawn, integrado por Cynthia Alfonso e Óscar Raña, todos eles antigas e antigos estudantes de Belas Artes. Coa tamén licenciada da facultade Sara Donoso como comisaria, esta exposición busca ir máis aló, explica, da “mostra artística convencional para converterse nun acto de reflexión sobre a importancia de reabrir” a cafetaría do centro “como punto social e de intercambio de ideas para a facultade”.
Despois de que as diferentes convocatorias para a adxudicación deste servizo quedasen desertas, o espazo que ocupaba a antiga cafetaría foi acondicionado no curso 2022/2023 para converterse na sala O Abrigo, que desde entón vén acollendo un programa de exposicións, protagonizado principalmente polas creacións do alumnado, así como outra serie de actividades do estudantado do centro.
A arte como construtora de diálogos
Inserida na programación da sala de exposicións do campus de especialización CREA e promovida co apoio da Deputación de Pontevedra, Bar-cafetería. Grazas pola súa visita “non é exactamente unha cafetería”, pero tampouco “unha exposición ao uso”, xa que o proxecto formúlase como “un organismo vivo” no que a “demanda da reapertura da cafetaría se converte en pretexto para reactivar a memoria afectiva da facultade e converterse nun espazo de encontro colectivo e mutante”, como apunta Donoso. Nese senso, a mostra que se inaugurará o vindeiro xoves, ás 20.00 horas, permitirá tanto gozar das obras das e dos diferentes artistas como tomar un café ou unha infusión e sentarse a ler e conversar.
Nas creacións do colectivo Rapapawn, Tayone e Ardid están presentes as superposicións, a repetición e a acumulación, coas que aluden, como sinala Donoso, “a un mundo a medio facer, a un proceso de bucle constante”. Nese senso, a exposición preséntase como un “ensaio dun espazo coral, que emprega a arte non como obxecto, senón como vehículo de construción de diálogos, máis aló da súa formulación plástica, indicando o seu valor como plataforma colectiva de análise e entendemento”. Esa idea verase reflectida ademais a través da organización de dúas exposicións efémeras do alumnado, guiadas por Alfonso e Raña e polo coordinador da sala e vicedecano de Cultura, Ignacio Pérez-Jofre.
A mostra, que poderá visitarse ata o 30 de maio na sala de exposicións do campus de Pontevedra, verase completada coa presenza do cadro Un berro por Belas Artes, realizado por Laxeiro en 1993 e presente durante décadas nas paredes da antiga cafetaría.
Noticia completa: DUVI