Protagonistas da nova exposición que este xoves se inaugura na Sala Universitaria Profesor Manuel Moldes, tanto Alberto Ardid, Tayone e os integrantes do colectivo Rapapawn, Cynthia Alfonso e Óscar Raña, como a súa comisaria, Sara Donoso, formáronse na Facultade de Belas Artes. Este vínculo común e, nomeadamente, as súas lembranzas do punto de encontro que supuña a antiga cafetaría do centro convertéronse no punto de partida da mostra Bar-Cafetería. Grazas pola súa visita, un proxecto que mestura as ideas de exposición e cafetaría co propósito de facer desta sala un espazo de encontro.
“Non é exactamente unha cafetaría, tampouco unha exposición ao uso”, recoñece Donoso dunha exposición, promovida coa colaboración da Deputación de Pontevedra, que poderá visitarse ata o 30 de maio na sala de exposicións do campus. Neste proxecto, as obras destes artistas conviven con mesas e cadeiras da antiga cafetaría da facultade, á vez que algúns elementos do seu mobiliario forman parte das instalacións que completan este proxecto expositivo. “A idea é que o espazo teña vida e que a xente o entenda como un punto de encontro, ao que veña gozar das obras, pero tamén usalo”, engade a comisaria desta mostra, na que será posible tomar café e infusións ou consultar diferentes libros e catálogos.
Nesa mesma liña, e coordinador da sala, Ignacio Pérez-Jofre, destaca o interesante deste “concepto expositivo relacional”, que “incide na necesidade de aumentar esa atmosfera de encontro entre estudantado e profesorado” na Facultade de Belas Artes, á que contribuía unha cafetaría que no curso 2022/2023 foi acondicionada para se converter na sala O Abrigo despois de que as diferentes convocatorias para adxudicación do servizo quedasen desertas. De aí que o tamén vicedecano de Cultura poña de relevo o interese dunha proposta na que “os espectadores sexan tamén usuarios dunha cafetaría ficticia”, o que á súa vez fai que “a obra non sexa só o que se ve nas paredes, senón toda a acción”.
Un proxecto que mudou e continuará mudando
Outro dos aspectos de Grazas pola súa visita que Pérez-Jofre pon de relevo é o encaixe desta proposta cunha das liñas de traballo da sala, a de “atender a artistas que xa teñen unha certa traxectoria e que estudaron no noso centro”. De feito, como recoñece Donoso, o proxecto naceu “como unha exposición máis clásica”, que reunía as creacións de catro licenciadas e licenciados cuxos traballos “teñen unha relación entre si, tanto plástica e visual como conceptual” e aos que conecta tanto o uso de elementos propios da banda deseñada como o emprego “de obxectos en desuso ou que teñen outras connotacións a nivel social” e que trasladan ao campo da arte. Foi no propio proceso de desenvolvemento desta proposta cando, “dun xeito moi informal”, xurdiu esa idea de “recrear simbolicamente a cafetaría”, de tal xeito que a exposición converteuse á súa vez “nun acto de reivindicación e reflexión sobre a importancia de reabrir a cafetaría como punto social e de intercambio de ideas para a facultade”.
Noticia completa: DUVI