Pezas que, nun espazo concreto, transforman e reinterpretan obras previas, que á súa vez naceron como rexistros de accións artísticas. Creacións artísticas que xorden como “eco ou resposta” de obras previas de Cora Novoa, Elena Rocamora, Álvaro Porras e María Sánchez, reúnense na exposición Contar os dedos, que ata o 2 de novembro pode visitarse na Sala O Abrigo da Facultade de Belas Artes. Con Novoa e Rocamora, investigadoras da Universitat Politécnica de Valencia, como comisarias, esta exposición ten como punto de partida, explican, “obras de acción que cada artista realizou de maneira individual e cuxo rexistro se traballa desde diferentes formatos e medios, como a fotografía, o vídeo e a instalación”, dando lugar a novas pezas, nun “xogo de ecos”.
Inaugurada na tarde deste xoves, esta exposición insírese nas actividades do III Congreso Internacional de Creatividade, un evento promovido polo Campus Crea co apoio da Deputación de Pontevedra, que na tarde deste venres celebra a súa clausura na sede da Vicerreitoría do campus. Dentro desta programación, a egresada da Facultade de Belas Artes Cora Novoa e a investigadora da Politécnica de Valencia Elena Rocamora deron forma a un proxecto expositivo que explora como se interrelacionan entre si un conxunto de pezas que “parten do performativo, dialogando tanto co espazo como coas outras obras”, sinala Novoa.
“Traballamos con imaxes estáticas, vídeos, diagramas, imaxes feitas obxecto...”, engade a artista e comisaria dun proxecto que parte da documentación de accións en vídeo ou fotografías. Nese senso, o punto de partida da mostra son obras individuais, mais estas “materialízanse de diferentes maneiras e repénsanse a través de diferentes formatos”, engade Rocamora, dando lugar a unha serie de “pezas eco” que dialogan tanto coas obras das dúas comisarias como coas dos artistas convidados.
Ler a noticia completa no DUVI
As transformacións que tecnoloxías como a intelixencia artificial están a xerar nos ámbitos da arte, a comunicación, o deseño e a educación constitúen o eixe temático do III Congreso Internacional de Creatividade, que este xoves e venres se desenvolve na sede da Vicerreitoría. Promovido polo Campus Crea co apoio da Deputación de Pontevedra, este evento botou a andar na mañá deste xoves pondo de relevo o papel da creatividade para atopar respostas en “tempos de transformacións profundas”, como sinalaron desde o comité organizador, así como a importancia deste encontro científico á hora de acadar a acreditación do proxecto de especialización do campus de Pontevedra. No seu programa, combínase a presentación de 46 comunicacións por parte de investigadores e investigadoras de diferentes universidades de España, Portugal, Guatemala e Colombia, cunha serie de conferencias e mesas redondas. Entre elas, o relatorio inaugural que a artista Alicia Framis centrou nas orixes e no desenvolvemento dun proxecto que levouna a converterse na primeira muller en casar cunha intelixencia artificial.
Con máis de 70 inscritos e inscritas, a inauguración do congreso correu a cargo de Marián Fernández, vicerreitora do campus de Pontevedra; Rafael Domínguez, vicepresidente da Deputación de Pontevedra; e Sara Domínguez Lloria, codirectora desta edición xunto coa catedrática Margarita Pino. “Para o Campus Crea, este congreso é un dos piares estruturais para poder acadar a acreditación do campus de especialización”, salientou Fernández Villarino, que lembrou que este proxecto ten por diante “un reto importante”, o de tratar de obter en 2028 o recoñecemento como campus de especialización do Sistema Universitario de Galicia por parte da Xunta. No camiño cara esa “meta”, apuntou, son “determinantes” accións como un congreso que “implica investigación, docencia e transferencia de coñecemento” e que contribúe ao obxectivo de converter o Campus Crea “nun ecosistema de innovación e creatividade”. Neste punto, a vicerreitora puxo de relevo o “salto cualitativo e cuantitativo” que este proxecto pode supor para o campus de Pontevedra, do que destacou a “exclusividade e particularidade” dos estudos que nel se imparten.
Ler a noticia completa no DUVI
A Sala Universitaria Profesor Manuel Moldes abre a súa programación do curso 2026/2027 con Seres, unha exposición “sobre as entidades imaxinarias que poboan o noso folclore persoal e os vínculos que establecemos con elas”, segundo sinala o seu comisario, o artista e profesor da Facultade de Belas Artes Thomas Apostolou. A través de obras de diferentes disciplinas, realizadas por seis artistas orixinarios de Reino Unido, Alemaña, Brasil, Grecia e Zimbabue, esta mostra colectiva “reivindica a arte como unha forma de contacto co inaccesible”, engade Apostolou. Promovida co apoio da Deputación de Pontevedra, Seres celebra este xoves 8, ás 19.30 horas, a súa inauguración e reúne as pezas de Murilo Álvarez, Dominic Beattie, Anna Franke, James Alec Hardy, Deny Párchei e James Wright.
Ata o 1 de decembro poderá visitarse na sala de exposicións do campus unha mostra que reúne unha “ampla variedade de disciplinas, que inclúen escultura, cerámica, pintura, debuxo, instalación, video performance, arte sonora e escultura dixital”, salienta o seu comisario. Trátase ademais de obras realizadas por creadores e creadoras con diferentes traxectorias artísticas, desde figuras xa consolidadas ata estudantes da propia Facultade de Belas Artes, como é o caso de Álvarez. As súas obras, recoñece Apostolou, “non comparten un vocabulario visual formalmente parecido”, mais conéctanse a través desa capacidade que ten a arte “como nexo de comunicación co inaccesible”, de como “arquetipos, musas, demos, heroes, monstros, compañeiros e deuses, sendo produto da mesma multitude de medos, soños, desexos e razoamentos, a miúdo se manifestaron a través da arte”.
Nese senso, Apostolou recoñece que non buscaba “obras que compartiran unhas características ou conceptos determinados”, de tal xeito que, nun comezo, a conexión entre as diferentes pezas que integran esta mostra “permaneceu invisible para min”, ata finalmente atopar esa “presenza recorrente de entidades imaxinarias”.
Ler a noticia completa no DUVI
Filmes como A pantasma da ópera ou María, raíña de Escocia e series como Xogo de Tronos forman parte das producións audiovisuais que contaron coa participación da artista téxtil e investigadora Artanza Vilas no seu deseño de vestiario. Profesora asociada na Universidade das Artes de Londres, Vilas é a responsable de impartir o taller A impresión 3D e o téxtil, unha aproximación, unha iniciativa promovida polo Campus Crea que se desenvolve este martes e mércores no CREA Lab da Vicerreitoría.
“Imos estudar as posibilidades de utilizar o lapis 3D no contexto do téxtil, ben para crear estruturas baseadas en estruturas téxtiles tradicionais, ben para traballar directamente sobre un tecido”, sinala esta deseñadora. Nese senso, tanto a utilización deste lapis 3D sobre papel, acetato ou cristal, como as súas posibilidades no traballo cos tecidos forman parte dos contidos deste taller de 14 horas, divididas en dúas xornadas, que cubriu en poucos minutos as súas doce prazas.
A actividade botou a andar na mañá deste martes cunha serie de actividades dirixidas a que as estudantes participantes se familiarizasen con manexo desta ferramenta, para logo pór o foco nas súas posibilidades á hora de crear estruturas “que se asemellen ao téxtil, aínda que non sexan tecidos tradicionais”. Para iso, explica Vilas, as alumnas traballan principalmente con filamentos ríxidos, cos que “explorar xeometrías que poidan engadir flexibilidade” ás estruturas xeradas, de tal xeito que estas “se comporten” como un elemento téxtil. Por outra banda, empregarán tamén estes lapis “para debuxar sobre o téxtil”, nun taller “moi aberto” no que irán progresivamente “aumentando o volume” deses debuxos, co propósito de que poidan explorar as súas posibilidades como “unha fórmula para debuxar en tres dimensións” sobre un tecido.
Ler a noticia completa no DUVI
Achegar ao persoal investigador unha serie de ferramentas, ideas e estratexias que permitan dar maior difusión ao seu traballo é o obxectivo central das xornadas Redes sociais e IA para mellorar a visibilidade científica e académica, que este martes e mércores se desenvolven na Facultade de Comunicación. Promovida polo grupo CP2 Comunicación Persuasiva, trátase dunha iniciativa concibida como “un espazo de intercambio, exploración e traballo práctico arredor das posibilidades que ofrecen as redes sociais e a intelixencia artificial como aliadas para mellorar a comunicación pública das nosas investigacións, proxectos e accións de transferencia”, sinalan desde a organización.
Coordinadas pola profesora Mónica Valderrama e abertas ao conxunto da comunidade universitaria, estas xornadas teñen como obxectivo contribuír a “mellorar a visibilidade da actividade científica” do grupo CP2. Con ese propósito, o seu programa abrangue catro talleres, impartidos por profesionais e centrados en aspectos como a xeración de contidos accesibles e rigorosos para redes sociais, que contidos son máis adecuados para cada plataforma ou a creación de recursos divulgativos con ferramentas de intelixencia artificial.
Como explicou Valderrama, estas xornadas parten da idea de que, “dalgún modo, hai que devolverlle á sociedade o que se está investindo nas universidades públicas” e unha forma de facelo “é contando o que se fai nos laboratorios e nas aulas”. Aínda que aberta á comunidade, explicou, esta iniciativa ten como principal destinatario o persoal docente e investigador, co obxectivo de que poidan empregar “ferramentas que están ao alcance de calquera”, como a intelixencia artificial, para que as súas iniciativas “poidan chegar a un público máis amplo”.
Ler a noticia completa no DUVI
Coñecer o fenómeno da desinformación, con que finalidades se emprega, que colectivos sofren esta problemática en maior medida e cales son os mecanismos utilizados para a difusión de noticias falsas ou loiadas. Nestes aspectos afonda a formación impartida nos últimos días por técnicos de Ecos do Sur a preto de 40 estudantes do Grao en Comunicación Audiovisual, que traballarán ao longo do cuadrimestre na elaboración e difusión, a través das redes sociais, dunha serie de vídeos dirixidos a informar á cidadanía respecto destas cuestións. Fano no marco dunha nova edición do proxecto de aprendizaxe-servizo (ApS) Dixitais. Laboratorio cidadán para a competencia dixital e mediática, que coordina o profesor Alberto Dafonte e que arrincou con dúas sesións formativas impartidas por técnicos de Ecos do Sur na Facultade de Comunicación.
Seleccionado na convocatoria de proxectos de aprendizaxe-servizo no marco da Axenda 2030 e dos seus ODS da Vicerreitoría de Transferencia, Innovación e Impacto Social, trátase dun ApS inserido nas actividades da materia Propaganda en medios audiovisuais, que busca que o alumnado poida comprender o fenómeno da desinformación e os seus efectos ao tempo que xera recursos cos que axudar a identificala e combatela. “O que implica un ApS é que ti fas algo que esperas que teña unha repercusión positiva na sociedade, polo que non o fas de costas á sociedade, senón que tratas de ter unha interlocución”, salientaba Dafonte no arranque desta iniciativa. Con ese propósito, o proxecto conta un ano máis coa colaboración de Ecos de Sur, “unha organización moi implicada na loita contra o discurso do odio e a desinformación”, destaca o coordinador do grupo de innovación docente Dixitais.
Ler a noticia completa no DUVI
Como “unha selección de miradas” a un “territorio híbrido entre arte e ciencia” preséntase un libro editado pol grupos de investigación dx5, da Facultade de Belas Artes, en colaboración co grupo AF4, da Escola de Enxeñaría Forestal, que fai balance das reflexións xurdidas nas tres primeiras edicións do ciclo de encontros científicos Art at the Edge of Nature. Estes seminarios, desenvolvidos en Nova York e Pontevedra, puñan o foco nas conexións da creación artística co medio ambiente, a sustentabilidade, os novos materiais ou as humanidades dixitais, co obxetivo de “mapear” as prácticas que conectan arte, natureza e tecnoloxía, sinalan as súas responsables. Baixo o título de Posthumanismos interdisciplinares en el arte y la ciencia, o volume ten como editoras á investigadora Antía Iglesias e á responsable do grupo dx5, Ana Soler, e conta tanto cunha edición en papel como cunha versión dixital de acceso aberto.
Ao abeiro dunha estadía posdoutoral na School of Visual Arts (SVA) de Nova York, como beneficiaria dunha bolsa Fulbright, Iglesias impulsou en febreiro de 2025 este ciclo, cunha primeira ediciónno Biolab deste centro. O seu obxectivo, explica, era “activar un espazo de encontro entre creadoras, investigadoras e axentes culturais cuxas prácticas se aproximan á noción de natureza desde os seus límites de contacto con outras disciplinas”. Poucos meses despois, o BioBAT Art Space de Nova York foi sede da segunda edición deste seminario, que a finais dese ano desenvolvería un terceiro encontro en Pontevedra, froito da colaboración entre os grupos dx5 e AF4, xunto co Campus Crea e a Vicerreitoría do campus de Pontevedra.
Esta publicación, explica Iglesias, recolle agora “as reflexión e intervencións” dos investigadores e investigadoras convidados a esta terceira edición, xunto “unha revisión e contextualización das dúas primeiras xornadas, realizadas en Nova York”. Publicado polo Servizo de Publicacións da UVigo e coordinao por esta artista e investigadora, co apoio de Aldara Vázquez, o libro conta co financiamento da Xunta de Galicia, a través das Axudas do Programa de Consolidación e Estruturación de Unidades de Investigación Competitivas.
Ler a noticia completa no DUVI
Como “unha selección de miradas” a un “territorio híbrido entre arte e ciencia” preséntase un libro editado pol grupos de investigación dx5, da Facultade de Belas Artes, en colaboración co grupo AF4, da Escola de Enxeñaría Forestal, que fai balance das reflexións xurdidas nas tres primeiras edicións do ciclo de encontros científicos Art at the Edge of Nature. Estes seminarios, desenvolvidos en Nova York e Pontevedra, puñan o foco nas conexións da creación artística co medio ambiente, a sustentabilidade, os novos materiais ou as humanidades dixitais, co obxetivo de “mapear” as prácticas que conectan arte, natureza e tecnoloxía, sinalan as súas responsables. Baixo o título de Posthumanismos interdisciplinares en el arte y la ciencia, o volume ten como editoras á investigadora Antía Iglesias e á responsable do grupo dx5, Ana Soler, e conta tanto cunha edición en papel como cunha versión dixital de acceso aberto.
Ao abeiro dunha estadía posdoutoral na School of Visual Arts (SVA) de Nova York, como beneficiaria dunha bolsa Fulbright, Iglesias impulsou en febreiro de 2025 este ciclo, cunha primeira edición no Biolab deste centro. O seu obxectivo, explica, era “activar un espazo de encontro entre creadoras, investigadoras e axentes culturais cuxas prácticas se aproximan á noción de natureza desde os seus límites de contacto con outras disciplinas”. Poucos meses despois, o BioBAT Art Space de Nova York foi sede da segunda edición deste seminario, que a finais dese ano desenvolvería un terceiro encontro en Pontevedra, froito da colaboración entre os grupos dx5 e AF4, xunto co Campus Crea e a Vicerreitoría do campus de Pontevedra.
Esta publicación, explica Iglesias, recolle agora “as reflexión e intervencións” dos investigadores e investigadoras convidados a esta terceira edición, xunto “unha revisión e contextualización das dúas primeiras xornadas, realizadas en Nova York”. Publicado polo Servizo de Publicacións da UVigo e coordinado por esta artista e investigadora, co apoio de Aldara Vázquez, o libro conta co financiamento da Xunta de Galicia, a través das Axudas do Programa de Consolidación e Estruturación de Unidades de Investigación Competitivas.
Ler a noticia completa no DUVI
A xunqueira de Alba será o punto de partida das curtametraxes que dez estudantes do campus de Pontevedra desenvolverán nos próximos meses no marco do taller Filmes como marismas, promovido polo Campus Crea xunto con Novos Cinemas. A artista e cineasta madrileña Candela Sotos, gañadora do Premio Latexos na última edición deste festival, será a encargada de guiar os dez alumnos e alumnas seleccionados no proceso de creación destas pezas, nas que explorarán tamén o traballo con materiais de arquivo “heteroxéneos e contraditorios”, sinalan desde a organización. Ata o 2 de outubro permanece aberto o prazo de presentación de candidaturas para participar nun obradoiro que se completará coa estrea dos resultados finais na xornada inaugural da décimo primeira edición deste festival.
O concepto de zona húmida como un espazo "de transición entre a terra firme e auga”, onde os materiais arrastrados pola corrente “deposítanse, mestúranse, descompóñense e reorganízanse”, conéctase neste taller coa idea de memoria, como “territorio intermedio entre a historia e o presente”. Nese senso, a proposta deste obradoiro é que as marismas de Alba constitúan un espazo “desde o que poder construír procesos creativos audiovisuais e experimentar coas capas temporais históricas que o conteñen”. De feito, un dos obxectivos é que as e os participantes traballen con materiais “heteroxéneos e contraditorios”, de arquivos propios ou atopados, e que os exploren “desde a montaxe non lineal, con esa idea de sedimentación”, de capas "que se acumulan sen eliminar o anterior”.
Ler a noticia completa no DUVI