Ecofeminismo, arte en contexto, comunidade, herdanza e territorio. Estes cinco conceptos guían ao longo desta semana os once artistas, investigadoras e investigadores que participan en Ons na residencia Geografía Poética, promovido pola profesora da Facultade de Belas Artes da UVigo Holga Méndez e a docente da Universidad de Zaragoza Belén Díez, no marco da rede europea Artistic Intelligence. Responsiveness, accessibility, responsibility, equity (ARTinRARE). Procedentes de España, Portugal, República Checa, Italia, Colombia, Reino Unido, Austria, Serbia e Suecia, as e os seleccionados na convocatoria aberta para un workshop no que se lles convida a “repensar e reformular” os seus proxectos nas “coordenadas” dun seminario que busca conectar a acción e investigación artística co “contexto concreto da illa”, como explica Méndez.
Esta iniciativa insírese nas accións dunha rede de investigación financiada polo programa COST da Unión Europea, que centra o seu traballo en conectar a investigación artística baseada na práctica con outras culturas investigadoras ou novas ferramentas tecnolóxicas. Liderado polo Instituto de Investigación en Arte, Deseño e Sociedade da Universidade do Porto, o proxecto ARTinRARE conta coa participación de máis de 200 artistas e investigadores nos seus diferentes grupos de traballo e ten como punto de partida o concepto de intelixencia artística, que fai referencia á capacidade colectiva da investigación artística baseada na práctica para xerar impacto e valor máis aló dos resultados específicos dun proxecto. Estes grupos de traballo reuníanse o pasado mes de febreiro na Facultade de Belas Artes da UVigo, nun encontro promovido por Méndez, membro do comité de xestión desta rede e directora, xunto con Díez, do proxecto Geografía Poética. Impulsado pola Universidad de Zaragoza, esta iniciativa naceu en Teurel e tiña como obxectivo a creación dunha rede de conexións entre comunidade, patrimonio e territorio a través de intervencións artísticas contextualizadas.
Ler a noticia completa no DUVI
Artista téxtil, deseñadora e investigadora, Arantza Vilas ten colaborado ao longo da súa traxectoria no deseño de vestiario de producións audiovisuais como os filmes A pantasma da ópera, María, raíña de Escocia ou a serie Xogo de Tronos, ao tempo que levou a súa obra a galerías e museos de diferentes países. Profesora asociada no Central Saint Martins da Universidade das Artes de Londres, Vilas será a responsable dunha das conferencias do III Congreso Internacional de Creatividade, que se desenvolverá os días 8 e 9 de outubro en Pontevedra. Previamente, será tamén a encargada de impartir o obradoiro A impresión 3D e os tecidos, unha aproximación, unha iniciativa formativa promovida polo Campus Crea, que terá lugar os días 6 e 7 de outubro no CREA Lab da Vicerreitoría do campus.
A abordaxe dos tipos de tecnoloxías que, no eido da impresión 3D, poden levarse ao mundo dos tecidos, a utilización do lapis 3D sobre papel, acetato ou cristal e a experimentación sobre tecidos serán algúns dos eixes deste taller de 12 horas, dirixido ás e aos integrantes da comunidade universitaria. Cunha duración de 14 horas e con inscrición gratuíta, trátase dun obradoiro con 12 prazas, que este mércores abría a súa inscrición na plataforma Campus Activo.
Como sinalan desde a organización, a obra de Arantza Vilas abrangue múltiples disciplinas, pon énfase especial nos procesos e baséase na investigación sobre os materiais, destacando o seu interese pola artesanía tradicional e por ferramentas e métodos innovadoras e sostibles, “que poidan achegar novas ideas, contribuír á innovación nas narrativas e suscitar a reflexión”.
Ler a noticia completa no DUVI
Por terceiro ano consecutivo, Pontevedra será sede da gala de entrega dos Premios Feroz, promovidos pola Asociación de Informadores Cinematográficos de España (AICE). Novamente, este evento verase precedido por un conxunto de actividades centradas no audiovisual, que terán como sede o edificio que comparten as facultades de Comunicación e Dirección e Xestión Pública. Esta programación previa porase en marcha no mes de outubro, con cinco “maratóns de series” que permitirán coñecer as primeiras tempadas de Vida perfecta, Autodefensa, Paquita Salas, Fácil e Cardo, nunhas proxeccións que se verán complementadas por un coloquio cos seus creadores, creadoras ou protagonistas.
Promovida polo Concello de Pontevedra, coa colaboración da Universidade de Vigo, a programación de outubro foi presentada nesta xornada polo alcalde, Miguel Anxo Fernández Lores, e a vicerreitora do campus, Marián Fernández. Como explicaron, as obras que se están a acometer no Teatro Principal fan que “toda a programación previa dos Premios Feroz vaia desenvolverse na Facultade de Comunicación, o que permítenos como campus e como Universidade achegarnos un pouco máis á cidadanía”, salientou a vicerreitora. Fernández definiu esta programación como “unha oportunidade magnífica para establecer e continuar as sinerxías co Concello”, xa que estas actividades permiten achegar a cidadanía ao campus, ao tempo que “revisten na formación do noso alumnado”, dándolle a posibilidade de “participar de xeito voluntario e aprender deste tipo de eventos”.
Nesa mesma liña, Fernández Lores amosouse “encantado de ter cada vez máis colaboración co campus”, o que levouno a apuntar tamén a outras iniciativas, como “a cesión dun espazo para o Campus Crea dentro do Centro Internacional da Creatividade Maruxa Mallo” ou o traballo que están a realizar coa Universidade “para ver a posibilidade de mellorar a urbanización do campus”. Neste caso, o peche do Teatro Principal fai que o salón de actos do edificio que comparten Comunicación e Dirección e Xestión Pública, con capacidade para máis de 380 persoas, vaia acoller as proxeccións, para as que o Concello vai “habilitar un equipo de proxección de calidade".
Ler a noticia completa no DUVI
O profesor da Facultade de Comunicación Alberto Dafonte foi nomeado director de área de Campus Crea, cargo que lle leva a situarse á fronte dos traballos para a obtención da acreditación deste proxecto como campus de especialización do Sistema Universitario de Galicia (SUG). “É un proxecto importante para a Universidade e que terá unha repercusión moi positiva para o campus”, salienta este docente e investigador, quen xa formara parte do Comité de Dirección do Campus Crea entre 2014 e 2018.
Dafonte Gómez participara por aquel entón na posta en marcha “dalgunha das primeiras pedras” do proxecto de especialización, como a gala de presentación do Campus Crea ou a posta en marcha da Semana da Creatividade. Nese senso, recoñece que asume a dirección de área dentro da Vicerreitoría do campus de Pontevedra, como unha oportunidade de contribuír a un proxecto “importante para a comunidade universitaria de Pontevedra”. De aí que incida no “interesante” dunha área de traballo que dá a posibilidade “facer propostas que poidan redundar en beneficio dos centros, das titulacións e da comunidade que forma parte do campus”, contribuíndo tanto en materia de formación como na busca dunha “maior colaboración ou transversalidade” no eido da investigación.
Profesor titular do Departamento de Comunicacion e Publicidade, é o coordinador do grupo de investigación en Comunicación e Servizo Público (Sepcom) e do grupo de innovación docente Dixitais. Previamente, foi tamén secretario académico e videcano de Calidade da antiga Facultade de Ciencias Sociais e da Comunicación, na que se responsabilizou da posta en marcha do Mestrado en Comunicación en Medios Sociais e Creación de Contidos Dixitais, que coordinou entre 2017 e 2020.
Ler a noticia completa no DUVI
Inserido na programación de extensión universitaria da Vicerreitoría do campus de Pontevedra, a Facultade de Comunicación acolle nestas semanas o curso Gravación e produción musical, que permite aos seus máis de 20 inscritos e inscritas coñecer e traballar de xeito práctico cos diferentes procesos de produción musical, desde a gravación analóxica nun estudio ao uso de ferramentas de intelixencia artificial. “A idea é que saían do curso cunha visión ampla de todas as posibilidades que ofrece hoxe en día a tecnoloxía, para que logo poidan aplicar o criterio que se debería aplicar nun proceso de produción”, sinala o produtor e profesor da facultade Javier Abreu, responsable deste curso de 40 horas, que desenvolve a súa segunda edición con todas as súas prazas cubertas.
Esta iniciativa forma parte dunha programación de cursos de verán aberta a toda a cidadanía e reúne como alumnado "un grupo moi heteroxéneo”, recoñece Abreu. “Hai persoas que veñen de fóra do ámbito universitario e que xa teñen experiencia en procesos de produción e gravación, persoas que lles seduce todo este mundo e que parten duns coñecementos moi básicos e tamén alumnado universitario que tivo xa unha experiencia ou un primeiro contacto”, explica. “Isto permítenos traballar sobre proxectos multinivel e a verdade é que está sendo moi motivador todo o proceso”, recoñece Abreu, que ao longo da súa traxectoria como produtor traballou con grupos como Los Piratas, Ruxe Ruxe, Zenzar ou Killer Barbies.
Nese senso, explica que o obxectivo desta iniciativa é que as e os participantes saian do curso “cunha visión xeral” que lles permita “saber como deben abordar unha produción e gravación” e poidan logo seguir profundando en diferentes aspectos. Con esa idea, entre os obxectivos desta actividade figura tanto que poidan coñecer “o estado actual da industria de produción de música e as súas oportunidades”, como aplicar de xeito práctico procesos de produción musical tanto no eido do son orgánico como no do electrónico.
Ler a noticia completa no DUVI
A profesora do Departamento de Debuxo Carmen Hermo converteuse este luns na nova decana de Belas Artes, despois de que a súa candidatura, a única presentada no proceso electoral aberto no centro, recibise o apoio da Xunta de Facultade, con 26 votos a favor, un en contra e cinco abstencións. Hermo Lage situarase os próximos seis anos á fronte dun “equipo novo e, sobre todo, ilusionante”, que completan as e os docentes Carmen Lage, como videcana académica; Basilisa Fiestras, como vicedecana de Cultura e Estudantado; José Andres Santiago, como vicedecano de Internacional; e Marcos Covelo, como secretario académico.
Despois dunha Xunta de Facultade que combinou o seguimento presencial e virtual, Hermo sinalaba afrontar “con ilusión” a súa nova etapa á fronte da facultade, ao tempo que puña en valor o apoio recibido pola súa candidatura, xa que “o que necesitamos agora é traballo”, tanto no propio equipo decanal como á hora de integrar as diferentes comisións. A votación na que participaron 32 dos 38 membros da Xunta de Facultade converteu a artista e docente, profesora da facultade desde o curso 2017-2018, na segunda decana na historia de Belas Artes, tomando o relevo de Xosé Manuel Buxán, que se atopaba á fronte do Decanato desde 2019.
Na súa comparecencia, Hermo presentou un texto elaborado conxuntamente polo novo equipo decanal, que situaba os termos de "convivencia, cooperación, bidireccionalidade, asesoramento e modelo" como eixes do proxecto que prevén desenvolver ao longo dos próximos seis anos. “Non propoñemos grandes revolucións, pero si que son necesarios algúns cambios, cambios e propostas que atenderemos con interese e cariño”, salientou a nova decana, quen formou parte o último ano do equipo de Buxán como secretaria académica.
Ler a noticia completa no DUVI
Un retrato dunha rapaza que porta un pano en un mantón de Manila, realizado a finais do século XIX polo pintor cántabro Casimiro Sainz, constitúe o punto de partida da exposición que reúne unha trintena de obras da artista e profesora da Facultade de Belas Artes Chelo Matesanz, no Museo de Arte Moderno y Contemporáneo de Santander e Cantabria. Baixo o nome de Una chula, título da obra de Sainz, a docente do Departamento de Pintura propón un diálogo entre tradición e contemporaneidade nesta exposición individual, que se completará á súa vez cunha publicación que profundará tanto neste proxecto expositivo como na traxectoria e proceso creativo da artista e investigadora do grupo Prace.
Na mostra que ata o 11 de outubro pode visitarse no museo cántabro, Matesanz presenta preto dunha trintena de obras de recente creación, coa excepción de Fermosura del Norte, unha peza de 2006 que actúa como referencia dentro do conxunto expositivo. “Hai obras de creación recente, feitas precisamente para este proxecto, e outras elixidas en función da narración e o tema suxerido pola obra de Casimiro Sainz”, salienta Matesanz.
Nunha mostra comisariada por Marta Mantecón, este conxunto de pezas preséntase acompañadas pola pintura deste artista orixinario de Reinosa, ao igual que a propia Matesanz. Trátase, lembra a docente e investigadora, dun “retrato de perfil dunha rapaza nova vestida con elegancia”, que suxire “infinidade de cousas”, desde serenidade ou equilibrio, ata beleza, ornamento ou identidade. “A ‘chula’ aparece como símbolo da alma popular”, engade Matesanz, que lembra que Casimiro Sainz “sempre mostrou interese polas personaxes humildes e cotiáns” e que as súas pinturas de “mulleres lavando, anciáns ou campesiñas” mantiñan sempre “o mesmo espírito realista”, que as reflectía como “figuras dignas, traballadoras e auténticas, representadas con respecto e afecto”.
Ler a noticia completa no DUVI
Amplamente utilizados nos ámbitos da arte e da artesanía, pero tamén en determinados procesos industriais, a realización de moldes de escaiola cos que xerar diferentes copias dunha peza escultórica constitúe o eixe central dun curso de verán que nestas semanas se desenvolve na Facultade de Belas Artes. Inserido na programación de actividades de extensión universitaria da Vicerreitoría do campus, 20 persoas participan nunha actividade que busca achegarlles, dun xeito práctico, os procesos básicos de creación de moldes e ás súas posibilidades para a elaboración de pezas artísticas.
“Ao longo da historia, os moldes constituíron unha parte fundamental dos procesos escultóricos e de creación de formas, mantendo a súa relevancia na actualidade xunto cos novos materiais”, salienta Covadonga Barreiro, directora dun curso que conta coa participación como docentes do profesor da Facultade de Deseño Eduardo Outeiro, da titulada en Belas Artes e técnica en escultura Teresa Pece e da tamén licenciada desta facultade Iris Rodríguez.
Con diferentes sesións entre xuño e outubro, o obxectivo deste curso é dotar ás persoas asistentes dunha “base de coñecementos que lles permita ter unha visión xeral” dos moldes de escaiola, que fan posible xerar copias dunha peza en materiais como resina, cera ou barro. Con esa idea, a formación arrancou cunha sesión centrada nos tipos de moldes e nas súas características e aplicacións, para logo abordar as técnicas para a súa construción.
Ler a noticia completa no DUVI
O III Congreso Internacional de Creatividade terá como eixe temático as transformacións que tecnoloxías como a intelixencia artificial están a xerar nas catro áreas que abrangue o proxecto de especialización do campus de Pontevedra: a comunicación, o deseño, a arte e a educación. Promovido polo Campus Crea, co apoio da Deputación de Pontevedra, este foro académico desenvolverase os días 8 e 9 de outubro, reunindo no seu programa conferencias, mesas temáticas e presentacións de estudos que porán o foco “en como a creatividade se reconfigura nun contexto marcado pola intelixencia artificial, a sostibilidade, a ética dixital e transformación educativa”, sinalan desde o comité organizador.
Dirixido polas docentes da Facultade de Ciencias da Educación e do Deporte Margarita Pino e Sara Domínguez Lloria, con Susana Blanco como secretaria do comité organizador, este congreso estrutúrase un ano máis en catro bloques, correspondentes coas catro áreas do Campus Crea. Baixo o título de Conexións reais: deseño, arte e educación na era dixital, esta edición busca dar resposta á necesidade “de abordar unha realidade cada vez máis presente e con importantes implicacións de futuro nos ámbitos arredor dos cales se articula o congreso”, salienta Pino. “A tecnoloxía e, particularmente, a intelixencia artificial están a producir unha profunda transformación” nos eidos da educación, a arte, o deseño e a comunicación, “polo que consideramos necesario promover un espazo de análise, reflexión e debate sobre as súas posibilidades, desafíos e implicacións éticas e creativas”, subliña esta catedrática.
Ler a noticia completa no DUVI