A profesora do Departamento de Debuxo Carmen Hermo encabeza a única candidatura ao Decanato da Facultade de Belas Artes, tras completarse o segundo mandato do profesor Xosé Manuel Buxán á fronte do centro. Actual secretaria académica da facultade, Hermo Lage encabeza unha candidatura que completan as e os docentes Carmen Lage, Basilisa Fiestras, José Andrés Santiago e Marcos Covelo e que se someterá á votación da Xunta de Facultade o luns 27 de xullo.

Licenciada en Belas Artes pola Universidad de Salamanca e doutora pola Universidade de Vigo, Hermo salienta o “nivel de traballo e compromiso” das e dos integrantes da candidatura proclamada provisionalmente nesta xornada. Profesora da facultade  desde o curso 2017-2018, recoñece, de feito, que un dos aspectos que a levaron a dar o paso de presentar a candidatura foi contar con “xente nova á que lle apeteza involucrarse” no goberno da facultade. Nomeadamente, completan o equipo proposto as e os profesores Carmen Lage, como vicedecana académica; Basilisa Fiestras, como videcana de alumnado; José Andrés Santiago, como vicedecano responsable da área de internacional, e Marcos Covelo, como secretario académico. Trátase, subliña, dun equipo de “xente nova, implicada, que traballa moi ben, cunha metodoloxía moi efectiva”, o que á súa vez lévaa á pór de relevo que “necesitamos unha aproximación urxente” ás novas xeracións do alumnado, “moi separadas da nosa propia xeración”.

Tras a proclamación provisional nesta xornada, ábrese período de reclamacións, previo á aprobación definitiva da candidatura o vindeiro venres 24. O luns seguinte, someterase á votación das e dos 37 integrantes da Xunta de Facultade, debendo acadar máis votos a favor que en contra.

Ler a noticia completa no DUVI

Como traballo práctico para unha materia do Grao en Comunicación Audiovisual, o estudante Marzo Lozano debía realizar unha curtametraxe documental de cinco minutos, que decidiu centrar nun “home de orixe alemán, que vive nas montañas de Galicia, afastado da modernidade”, explica. As gravación realizadas para este traballo académico remataron á súa vez transformándose no punto de partida de El silencio de Allen Robert Angelo, un documental de 27 minutos, que converteu este estudante da Facultade de Comunicación no gañador da sección Supernova do Festival Internacional de Cinema Curtocircuíto.

Centrada, como sinalan desde a organización, en “primeiros traballos que teñen fácil acceso a grandes espazos de difusión profesional”, un total de 16 obras foron seleccionadas para esta sección dun festival que ten lugar en Santiago de Compostela e que celebraba nas últimas semanas a súa vixésimo terceira edición. Esta completouse cunha gala de entrega de premios na que Lozano Ramírez recollía un galardón cunha dotación económica de 1000 euros e co que “emocioneime moitísimo”, recoñece. “Cando recibín o correo electrónico que me avisaba de que gañara, non o podía crer”, admite este estudante, que outorga un “valor enorme” a un recoñecemento que ve como unha motivación para “seguir creando” e que ensinoulle que “non fai falla ter moitos recursos par facer algo que realmente teña valor”.

Ler a noticia completa no DUVI

Baixo o nome de Simulacro, a Facultade de Comunicación desenvolveu unha aplicación de realidade virtual que permite simular procesos de produción audiovisual nunha serie de platós virtuais nos que é posible pór a proba múltiples parámetros de iluminación ou de emprazamento de cámaras. Despois de incorporar, o pasado curso, unha localización exterior, esta aplicación continúa crecendo coa posta en marcha dun “construtor de espazos”, que permite ás persoas usuarias definir as características e localización de elementos no espazo virtual. “Supón unha flexibilización da ferramenta moi importante, que abre posibilidades para o seu uso máis aló da docencia, como ferramenta de previsualización”, sinala o vicedecano Oswaldo García, coordinador desta iniciativa.

Desenvolvida ao abeiro da convocatoria de proxectos piloto de innovación docente da Universidade, esta nova funcionalidade permite aos usuarios e usuarias desta ferramenta definir diferentes características dun set de interiores, desde a localización das paredes ou o tipo de solo, ata o emprazamento das ventás ou dos elementos de mobiliario. “Ata o de agora, Simulacro ofrecía dous platós interiores e unha localización en exteriores e agora temos xa unha versión beta que ofrece a posibilidade de que constrúas un espazo adaptado ao teu proxecto ou ás túas necesidades docentes”, sinala o coordinador deste proxecto. 

Concibida como unha ferramenta que, a través dunhas lentes de realidade virtual, permite ao alumnado desenvolver tarefas de realización, de dirección de fotografía ou de operador de cámara, estas novas funcionalidades achegan nese senso novas posibilidades á hora de amosar ao alumnado “fundamentos de realización ou iluminación”. Ao mesmo tempo, tamén amplían o potencial de Simulacro como “ferramenta de previsualización”, en eidos como a ficción, permitindo “construír espazos virtuais adaptados aos proxectos”, de tal xeito que o alumnado, por exemplo, podería “construír un xemelgo dixital das localizacións” das producións que desenvolven como traballos de fin de grao e “practicar no espazo virtual antes de ir á produción”, subliña García. 

Ler a noticia completa no DUVI

U

Coas ideas de luz, espazo e instante como fontes de inspiración, oito estudantes das facultades de Belas Artes e Deseño da UVigo desenvolven ao longo desta semana no Pazo de Mariñán, na localidade coruñesa de Bergondo, os proxectos artísticos polos que foron seleccionados para a sétima edición da Residencia de Artistas Emerxentes Encontros en Mariñán. Promovida pola Real Academia Galega de Belas Artes (RAGBA), coa colaboración das diferentes institucións participantes, esta iniciativa reúne preto de 40 estudantes de universidades, conservatorios e escolas de arte e deseño de diferentes puntos de Galicia, co obxectivo de establecer sinerxías que dean lugar a proxectos creativos de índole interdisciplinaria.

Promovida coa colaboración da Deputación da Coruña, a sétima edición desta residencia leva ao alumnado a convivir e crear conxuntamente “con estudantes doutras disciplinas e doutros ámbitos, nun espazo moi colaborativo”, sinala o profesor da Facultade de Belas Artes Ignacio Barcia, que coordina a participación da UVigo nestes encontros xunto co docente da Facultade de Deseño Román Corbato. Dirixida, como apuntan desde a organización, a “establecer sinerxías entre os distintos centros de formación artística de Galicia”, esta residencia conta coa participación do alumnado destes dous centros da UVigo, da Facultade de Arquitectura da Universidade da Coruña, do Conservatorio Superior de Música da Coruña, das escolas de arte e superiores de deseño Antonio Faílde, Mestre Mateo, Pablo Picasso e Ramón Falcón, da Escola Superior de Arte Dramática de Galicia, do CIFP Imaxe e Son e do Espazo de Danza da Universidade de Santiago de Compostela.

Coordinados por Mónica Alonso, xunto con Barcia, estes encontros combinan o traballo no desenvolvemento dos diferentes proxectos cunha serie de conferencias e sesións musicais, A estas sumarase na tarde do xoves, a partir das 19.00 horas, unha xornada de portas abertas, dirixida a que as e os visitantes poidan coñecer o resultado desta semana de traballo, que se completará o venres cunha xornada de reflexión e entrega de diplomas.

Ler a noticia completa no DUVI