Sensibilizar á poboación respecto dos efectos do tabaquismo, unha das principais causas de enfermidade e morte prematura no mundo, a través de mensaxes “visualmente impactantes”. Esta é a proposta que a Área Sanitaria de Pontevedra e O Salnés trasladou ao alumnado da Facultade de Deseño, que traballou nas últimas semanas na creación dunha serie de carteis, pensados para a súa exhibición en contornas hospitalarias. Os prototipos das preto de dez propostas finalmente seleccionadas e que poderán verse no Hospital Montecelo presentáronse este venres neste centro hospitalario, no marco da xornada institucional promovida pola Área Sanitaria con motivo da conmemoración do Día Mundial Sen Tabaco.

Con mensaxes como “romper unha adicción non é só ter vontade”, as propostas ideadas polas alumnas e alumnos do Grao en Deseño foron presentadas neste acto pola profesora Silvia García, responsable da materia Deseño para todas as persoas: transmisión e mediación, na que se inseriu este proxecto. No marco desta colaboración, as preto de 40 alumnas e alumnos desta materia compartiron en primeiro termo nun coloquion na facultade coa facultativa da Subdirección de Humanización e responsable do Plan de Acción de Tabaquismo da Área Sanitaria, Victoria Aldea, e coa responsable de Formación Continuada do persoal médico do Complexo Hospitalario Universitario de Pontevedra, Rosa Conde. Tras este primeiro achegamento á proposta e á realidade do tabaquismo, as e os estudantes debían traballar en deseños e mensaxes pensados para unha contorna hospitalaria. Isto levouno en primeiro termo unha “etapa de prospección”, que permitiulles coñecer “a complexidade das mensaxes no contexto hospitalario, no que hai distintas realidades”, recoñece García, que incide en que unha parte do traballo centrábase en que “pensaran na diversidade de poboación que vai a un hospital e en como se leen as mensaxes”. 

Ler a noticia completa no DUVI

Unha imaxe dun fotomatón, tomada nas proximidades do Coliseum da Coruña, converteu o fotógrafo e profesor da Facultade de Comunicación Jorge Lens nun dos gañadores de RecorridosUrbanosPHE26, un certame promovido polo festival PhotoEspaña xunto coa cadea hoteleira One Shots Hotels. Centrada en fotografías realizadas en contornas urbanas, trátase dunha convocatoria desenvolvida a través da rede social Instagram, que reuniu preto de 2500 fotografías na súa quinta edición. Un xurado integrado polo equipo artístico de PhotoEspaña, un representante da cadea hoteleira e o fotógrafo Matías Costa, como profesional independente, seleccionou as dez imaxes finalistas, que integrarán unha exposición colectiva en Sevilla dentro da programación do festival, así como as catro imaxes gañadoras. Entre elas atópase a realizada por Lens, quen ten na fotografía urbana unha das liñas centrais do seu traballo e que xa fora finalista deste certame na súa anterior edición.

Como “un impulso para seguir crendo na fotografía nesta época de tanta intelixencia artificial” recibía Lens este recoñecemento a unha imaxe tomada en 2025 nas proximidades do Coliseum coruñés, antes dun concerto de Rigoberta Bandini. Neste punto, o fotógrafo e docente pon de relevo a “ilusión” que implica “ver que en certo o modo o teu traballo é recoñecido”, nunha iniciativa promovida por un festival no que se insiren cada ano un amplo abano de exposicións en diferentes puntos de España. 

Ler a noticia completa no DUVI

Nacida como traballo para unha materia do Grao en Belas Artes, a curtametraxe Ausencia, da estudante Gema Rodríguez, foi dobremente premiada no XXIII Festival de Cans. Xurdida, explica, da “necesidade de trasladar o dó ante a morte dun familiar”, a súa creación proclamábase gañadora da sección Novas Camadas, que este festival dedica aos creadores e creadoras menores de 25 anos, á vez que acadaba tamén o Premio do Xurado da Mocidade, outorgado por un grupo de mozos e mozas desta aldea do Porriño.

A través de “fragmentos dunha cinta de vídeo de arquivo familiar e de imaxes desenfocadas”, Rodríguez buscou na súa curta tanto “plasmar ausencia” como a “ferida” que supuxo esta perda. De aí que vexa este galardón como “o final a un proceso persoal de catarse”, ademais de como un valioso recoñecemento á hora de “empezar a formar parte deste mundo do cine no que me gustaría seguir”. Resultado dun traballo “no que tiñamos que facer un vídeo autobiográfico”, explica, Ausencia exhibiuse publicamente por primeira vez na anterior edición do (S8), a Mostra Internacional de Cinema Periférico da Coruña, no marco da sección Paraíso, que cada ano presenta unha escolma de pezas realizadas polo alumnado da facultade, baixo a coordinación da profesora Xisela Franco.

.

Ler a noticia completa no DUVI

Promovido polos grupos de investigación dx5, da Facultade de Belas Artes, e AF4, da Escola de Enxeñaría Forestal, Art at the Edge of Nature é un ciclo itinerante de encontros científicos centrados nas conexións entre arte, natureza e ciencia, que nestes días desenvolve a súa cuarta edición na Universidad Complutense de Madrid. O espazo La Trasera da Facultade de Belas Artes da UCM é a sede desta nova edición dun evento centrado en afondar, “desde unha perspectiva interdisciplinar”, nas relacións “entre prácticas artísticas, investigación científica e pensamento ecolóxico contemporáneo”, sinalan desde a súa organización.

Coordinado pola investigadora Antía Iglesias, xunto coa profesora de Belas Artes Ana Soler, directora do grupo dx5 (digital & grahpic art research) e a directora da EE Forestal, Ángeles Cancela, o encontro que nestas dúas xornadas se desenvolve en Madrid conta tamén co apoio do Campus Crea, a través da convocatoria de axudas á organización de congresos, promovida co financiamento da Deputación de Pontevedra. Nela, máis dunha vintena de artistas, investigadoras e investigadores protagonizan as conferencias e mesas de debate dos catro eixes temáticos nos que se estrutura esta edición, que leva por título Responsabilidades y conciencias biocreativas. Á fronte deste encontro sitúase un comité organizador integrado polas investigadoras da UVigo e os docentes da UCM Santiago Morilla, José Carlos Espinel e José Enrique Mateo.

Ler a noticia completa no DUVI