Na súa edición con maior número de participantes, a Xornada de Investigación Crea reuniu 23 estudantes de diferentes programas de doutoramento, que presentaron as súas liñas de traballo nun encontro que se levou a cabo tanto na Escola de Enxeñaría Forestal coma na Facultade de Comunicación. Promovido polo Campus Crea, co apoio do Consello Social da Universidade de Vigo, trátase dunha iniciativa que busca dar visibilidade a estudos relacionados coas diferentes liñas do proxecto de especialización, contribuíndo a proxectar os procesos de investigación como “un dos piares fundamentais do Campus Crea”, salientou a vicerreitora, Marián Fernández.
Esta xornada completouse coa entrega dos VI Premios Crea, promovidos co apoio da Deputación de Pontevedra. Estes galardóns foron outorgados á investigadora da Facultade de Belas Artes Sara Piñeiro, por unha investigación plástica baseada no traballo con po de granito, e á egresada da Facultade de Comunicación Cristina Martínez, por un vídeo-ensaio sobre os elementos narrativos comúns do cinema luso-galaico.
O acto de entrega contou coa participación da vicerreitora do campus; do vicepresidente da Deputación, Rafael Domínguez; e do presidente do Consello Social da UVigo, Ernesto Pedrosa, así como do director de área do Campus Crea, Alberto Dafonte. Na súa intervención, Marián Fernández destacou que esta xornada reuniu tanto estudantes de diferentes programas de doutoramento da UVigo como doutras universidades galegas e resaltou a importancia de divulgar os resultados dos procesos de investigación, xa que a transferencia de coñecemento “conforma outro dos piares fundamentais do Campus Crea”. Nese senso, puxo en valor as contribucións tanto do estudantado, como dos grupos de investigación e das facultades vinculadas ao Campus Crea no “grande obxectivo” de acadar no ano 2028 a acreditación como campus de especialización do Sistema Universitario de Galicia (SUG).
Pedrosa, pola súa banda, definiu este proxecto como “un espazo vivo” que ten na “creatividade e na innovación social” os seus eixes e que avoga por ir máis aló das “fronteiras entre diversas disciplinas”, mentres que Domínguez reivindicou o lugar de Pontevedra como “cidade da creatividade”.
Ler a noticia completa no DUVI