Desde 2019, a ONG Project Net coordina en diferentes cidades de Letonia un proxecto de universidade sénior á que, no marco dunha iniciativa financiada polo programa comunitario Erasmus+, proxectan incorporar a creación dunha radio. Co obxectivo de formar aos e ás responsables deste programa na creación de contidos radiofónicos e coñecer boas prácticas en materia de formación ao longo da vida, integrantes desta organización atópanse nestes días desenvolvendo unha estadía en Galicia, que este xoves levounos ata a Facultade de Comunicación, onde, coa colaboración do Decanato, puideron participar nunha sesión formativa sobre funcionamento e edición de podcast.
Sete profesionais desta organización, entre os que se atopa a súa responsable, Iveta Cirule, puideron coñecer nesta xornada as instalacións da facultade pontevedresa, acompañados polo vicedecano Vicente Badenes e polo profesor Xabier Martínez Rolán, encargado de impartirlles un taller sobre comunicación sonora e creación de podcast. Ao mesmo tempo, sinalan, a visita contribuíu tamén a establecer lazos de cooperación internacional, un dos obxectivos do proxecto Erasmus+ que desenvolven coa colaboración da Universidade da Coruña, onde nestes días participaron tamén en diferentes actividades. Nese senso, o propósito desta visita era achegar coñecementos sobre creación de contidos as e os profesionais desta organización de cara a posta en marcha dunha primeira experiencia de “radio sénior” con grupos de participantes nos programas formativos para maiores que levan a cabo.
Como un proxecto que representa “anos de formación, descubrimentos e transformacións” preséntase Do final e do comezo, a exposición que reúne no Pazo de Cultura as creacións que 27 novos titulados e tituladas en Belas Artes desenvolveron como traballos de fin de grao. Promovida polo Concello e a facultade, esta mostra colectiva foi inaugurada na noite deste martes, nun acto no que participaron o alcalde de Pontevedra, Miguel Anxo Fernández Lores, o decano, Xosé Manuel Buxán, o concelleiro de Cultura, Demetrio Gómez, e a comisaria da mostra, Alexandra R. Rey.
“Este proxecto amosa o final dun ciclo para abrir portas a novas experiencias, retos e camiños”, recolle o texto de presentación da exposición, que lembra tamén a figura de Juan Carlos Meana, quen impulsou na súa etapa ao fronte do Decanato esta exposición anual. Seleccionados nunha convocatoria aberta aos TFG defendidos o pasado curso, Do final e do comezo busca articular “unha panorámica das múltiples propostas, investigacións e pensamentos que se formaron no contexto da facultade”, reunindo un conxunto de obras que abranguen desde a pintura ou a fotografía ata a instalación ou a escultura. As creacións de 25 novas tituladas e dous titulados integran unha mostra que reflicte unha diversidade de intereses e temáticas, conectadas á súa vez, como sinalou a súa comisaria, polo seu interese de indagar sobre a súa orixe e polo traballo con elementos téxtiles en múltiples tipos de obras.
Achegar o alumnado á realidade profesional en diferentes sectores é o obxectivo das Conversas Empresa Universidade, unha serie de encontros promovidos polo Campus Crea, coa colaboración da Deputación de Pontevedra e o Consello Social da Universidade de Vigo, que terán como protagonistas unha vintena de profesionais da fotografía, a creatividade, a fisioterapia e o deseño. “Que empresas e profesionais poidan darlles a súa visión sobre o mercado laboral é algo moi importante para o alumnado”, salienta a directora da Área do Campus de Especialización Crea, Ana Belén Fernández Souto, dunha actividade que arranca o venres 27 na Casa das Campás cun encontro sobre fotografía. A continuación, o luns 30 terá lugar unha xornada sobre creatividade publicitaria na Facultade de Comunicación, mentres que a do 9 de novembro centrarase na fisioterapia, pechándose esta iniciativa, entre o 27 de novembro e o 1 de decembro, cunha serie de talleres na Facultade de Deseño.
Coa excepción destes talleres, que polo seu formato estarán limitados ao alumnado desta facultade, o resto de xornadas están abertas tanto ao estudantado como ao público xeral. Nelas, explica Fernández Souto, participarán “desde profesionais que crearon a súa propia empresa a persoas que traballan por conta allea e que xa teñen un percorrido”, que achegarán ao alumnado tanto "a súa visión da realidade do seu sector e do seu futuro inmediato”, como o seu percorrido profesional.
Impulsar unha liña de colaboración no eido cultural coa Universidade do Minho foi o do motivo central dun recente encontro entre representantes da institución portuguesa e da Vicerreitoría do campus, que ten como primeiro resultado a participación, na tarde deste venres, dun grupo de estudantes de teatro chegados desde Braga na xornada de peche da Miteu. Horas antes de estrear no Teatro Principal a súa obra Roleta Mortis, este grupo de alumnos e alumnas foron recibidos na Casa das Campás pola vicerreitora Eva María Lantarón e o director de área adxunto á Vicerreitoría, Luis Torres, así como polo coordinador desta mostra, Salvador del Río.
Esta colaboración, que permite ademais achegar esa “compoñente internacional”, como sinala Lantarón, á XIV edición destra mostra, parte do encontro mantido recentemente coa vicerreitora de Cultura e Territorio da Universidade do Minho, Joana Aguiar, e a pro-reitora de Comunicación Institucional, Teresa Ruão. O seu obxectivo, sinala Lantarón, é promover un “intercambio cultural e abrir fronteiras”, posibilitando iniciativas como que este grupo de estudantes “poidan vir aquí e mostrar todo o que aprenderon ao longo do curso a través desta obra”, pero tamén que as de teatro ou de música tradicional do campus poidan participar en actividades en Portugal. Do mesmo xeito, búscase tamén “aproveitar as sinerxías que podemos fomentar e que poden axudar a engrandecer ás dúas universidades, tanto a do Minho como a de Vigo”, engadiu a vicerreitora, que sinalou a vontade de que esta colaboración poida ir máis aló do cultural “e que tamén nos axude na especialización do campus e a facer visible o Campus Crea”.
Este venres 9 de xuño ábrese o prazo de presentación de candidaturas para participar na décima edición do Pont-Up Store, “o principal evento de fomento da innovación e o emprendemento do noroeste peninsular”, como sinalan desde a organización, que se desenvolverá os días 29 e 30 de setembro en Pontevedra. Promovido pola Universidade de Vigo, no marco do Campus Crea, e organizado polo grupo de investigación G4P Plus Desenvolvemento Estratéxico: organizacións e territorios e a Asociación para o Emprendemento e a Innovación Pont-Up Store, co Concello de Pontevedra como patrocinador principal, este evento achega aos novos emprendedores e emprendedoras a posibilidade de dar a coñecer os seus produtos e servizos. Nesta décima edición disporán de dúas modalidades para facelo, a través do 35 stands gratuítos que se instalarán no recinto da Praza de España e do evento Pont-Up Exprés, no que dez novos emprendedores e emprendedoras presentarán os seus proxectos a representantes do tecido empresarial galego.
Aberto a proxectos de emprendemento “innovador e creativo”, que leven en funcionamento menos de tres anos e medio (42 meses) ou que se atopen nunha “fase moi avanzada de desenvolvemento”, o prazo de presentación de candidaturas para estas dúas modalidades de participación permanecerá aberto desde este venres ata o 9 de xullo. A organización seleccionará as iniciativas baseándose en criterios como a orixinalidade, a innovación e creatividade do proxecto, o seu valor social, a súa sustentabilidade, o seu potencial económico ou social e a capacidade de desenvolvemento futuro.
Muíñeiras, xotas, mazurcas, pasodobres e polcas soaron na tarde deste luns na pontevedresa praza da Verdura, espazo no que a Aula Permanente de Música Tradicional Galega abría o ciclo de actuacións no espazo público que desenvolve ao longo do mes de xuño. Dirixido a achegar á cidadanía os resultados da actividade formativa que a Vicerreitoría do campus promove desde hai seis cursos, esta primeira actuación tivo como protagonistas ás preto de 30 persoas que integran o grupo de gaitas e percusión desta aula. Co músico Suso Vaamonde como responsable, trátase dunha actividade formativa aberta á participación e toda a cidadanía, que permite iniciarse ou perfeccionar coñecementos no manexo de diferentes instrumentos populares.
Os avances neste eido das 44 persoas que participaron no presente curso nesta actividade fixeron posible a posta en marcha dun grupo estable de música tradicional no campus que, tras participar en diferentes actuacións dentro e fóra da Universidade, neste mes de xuño protagoniza unha serie de concertos en diferentes prazas da cidade. Programados todos eles para as 20.30 horas e impulsado coa colaboración do Concello, este ciclo arrancou na tarde deste luns na Verdura e trasladarase o día 12 á praza do Teucro, onde o grupo de gaitas e percusión estará acompañado en varias pezas polo coro sénior do campus de Vigo e polo novo grupo de baile tradicional do campus, xurdido do obradoiro de iniciación impulsado no presente curso por primeira vez. Á semana seguinte, a actuación trasládase á praza da Ferraría, onde estarán acompañados polo Grupo de Danza da Universidade de Santiago de Compostela. Finalmente, este ciclo pecharase o día 26, no último luns de xuño, cun concerto na praza de España protagonizado pola aula ao completo, tanto con gaitas e percusión como con acordeóns, zanfonas, ocarinas e frautíns,e no que participarán tamén outras seis agrupacións. Concretamente, sumaranse a esta actuación a Escola de Instrumentos Populares Galegos Suso Vaamonde de Caldas de Reis, a asociación Amigos da Música de Salceda de Caselas, a agrupación folclórica Tequexetéldere da Estrada, a Escola Municipal de Música e Baile Tradicional do Concello de Outes, a asociación cultural A Fuliada de Betanzos e o grupo folclórico Hai que Roelo de Cuntis.
Máis de 550 alumnas e alumnos das diferentes facultades e escolas do campus pontevedrés festexarán nas próximas semanas o final da súa etapa como universitarias e universitarios, que iniciaban poucos meses antes de que a pandemia da covid-19 obrigase ao confinamento e á conversión temporal da docencia en virtual. De aí que a súa capacidade de adaptación sexa unha das cuestións que se porá en valor nas diferentes graduacións que se desenvolverán no campus entre este venres e finais de xuño.
A primeira graduación no campus terá lugar na tarde deste venres, cando a Facultade de Ciencias da Educación e do Deporte despida aos e ás 233 integrantes das décimo primeiras promocións dos seus tres graos. Farao en tres actos consecutivos, que terán lugar no salón de actos do edificio que comparten as facultades de Comunicación e Dirección e Xestión Pública e nos que actuará o Coro do Campus. En primeiro termo, recibirán as súas bandas e diplomas as 78 novas tituladas e titulados en Educación Infantil, que terán como padriño ao profesor Rubén Domínguez, e a continuación farano os 85 novos graduados e graduadas en Ciencias da Actividade Física e do Deporte, con Marián Fernández Villarino e Ezequiel Rey como madriña e padriño académicos. Os últimos en subir ao escenario serán os 70 novos titulados e tituladas en Educación Primaria, que escolleron á profesora Alicia González como madriña e ao PAS Francisco Pena como padriño. As intervencións da vicerreitora Eva María Lantarón; o decano, Óscar García, e o deputado provincial Gorka Gómez sumaranse nestes tres actos as verbas de María González, Aldara Pérez, Helena Pardo e Pablo Saldaña en representación dunhas promocións que, como lembra a vicedecana Eulalia Agrelo, “caracterízanse pola súa resiliencia”, xa que viviron “todas as fases da pandemia: desde o peche total e o reinicio das aulas polo Campus Remoto ata chegar á presencialidade plena”.
Como bailar nun serán. Ese é o título do obradoiro de iniciación ao baile tradicional galego que, ao longo deste cuadrimestre, permitiu ás 18 persoas que cubriron as prazas ofertadas na primeira edición desta actividade un primeiro achegamento aos principais ritmos soltos e agarrados, como a muiñeira, a xota, o pasodobre e o valse. Inserido na programación cultural da Vicerreitoría do campus, este taller de 30 horas ten como docente á mestra de baile, pandeireta e canto tradicional Montse Rivera, integrante do grupo de pandeireteiras Leilía. “A maior parte das persoas comezaron de cero”, recoñece a responsable deste obradoiro de iniciación, que finalizará no mes de xuño e que ten como obxectivo que as e os participantes adquiran “uns coñecementos base” dos principais ritmos do baile tradicional, “para que poidan chegar a unha foliada e ser capaces de integrarse e incluso botar un punto”. Non obstante, como sinalara o director de área adxunto á Vicerreitoría, Luis Torres, trátase tamén da primeira edición dunha iniciativa “á que buscamos dar continuidade”, de tal xeito que poida, no futuro, dar lugar á creación dun “grupo estable” de baile no campus.
Deste xeito, esta iniciativa busca complementar outras propostas postas en marcha no campus como a Aula Permanente de Música Tradicional Galega, que tamén iniciou a súa andaina como obradoiro e que rematou facendo posible a creación dun grupo musical que ten protagonizado xa múltiples actuacións, tanto dentro como fóra da Universidade. “As pedras vanse poñendo pouco a pouco e a onde poidamos chegar vai depender de como o acolla a xente, pero, polas ganas que vexo, eu penso que ten futuro e que podemos chegar lonxe”, recoñece nesa mesma liña Rivera, sen esquecer, non obstante, “que non hai que correr cando non sabes andar”.
Reunir múltiples visións do que a creatividade supón e significa. Ese era o propósito de concurso de fotografía en liña impulsado polo Campus Crea no marco da programación da Semana da Creatividade e da Innovación. Aberto á participación de toda a cidadanía, este certame buscaba reunir en Instagram un conxunto de imaxes que permitisen reflectir a idea de creatividade no seu sentido máis amplo. Das diferentes fotografías publicadas nesta rede social co cancelo #creaUVigo2023 polos inscritos e inscritas neste certame, o xurado decidiu outorgar o primeiro premio a unha imaxe que ten na natureza a súa principal protagonista e que foi realizada por Zeltia Patiño, estudante do Máster en Investigación e Innovación en Didácticas Específicas para Educación Infantil e Primaria. Dúas alumnas deste mesmo mestrado da Facultade de Ciencias da Educación e do Deporte, Nerea Fernández e Cristina Pérez, foron así mesmo recoñecidas co segundo e terceiro premio.
Resultado un paseo polo monte “nun día no que se deixaba ver un pouco o sol despois dunha mañá chuviosa”, Patiño Diéguez concorreu a este certame cunha imaxe na que buscou “reflectir a creatividade coa sinfonía de cores que compoñen” unha composición que, recoñece, podería ter titulado “a calma do monte”. A súa fotografía foi recoñecida cun primeiro premio, dotado cun vale de 200 euros para gastar en material formativo e educativo no comercio local. Trátase, engade, do primeiro galardón que obtén por unha fotografía, tras ter sido premiada en dúas ocasións polos seus debuxos. De feito, esta graduada en Educación Primaria admite ter recibido con sorpresa este galardón e recoñece que ter cursado no mestrado dúas materias relacionadas coa arte, “axudoume a plasmar o que se pedía”.