Recuperada en 2022 despois de doce anos de parón, Pontevedra acollerá entre o 29 de maio e o 9 de xuño a súa XIV Mostra Internacional de Teatro Universitario (Miteu), que permitirá coñecer as obras desenvolvidas nas aulas teatrais dos tres campus da UVigo, así como unha montaxe do alumnado da Universidade do Minho. Promovida pola Vicerreitoría do campus, coa colaboración do Concello de Pontevedra, a Miteu desenvolverá a súa programación no Teatro Principal, con funcións programadas para as 21.00 horas, todas elas con entrada libre ata completar a capacidade da sala. A programación ábrese o vindeiro luns con Incendios, da aula de teatro de Vigo, e continúa o mércores con O mundo como vontade, do grupo Cordelia do campus de Ourense. O xoves 1, poderá verse a nova montaxe da aula do campus pontevedrés, Intermitencias, mentres que o xoves 8 presentarase As cidades agochadas, do grupo ourensán Maricastaña, pechándose a programación o venres 9 con Roleta Mortis, da Universidade do Minho.
“É unha actividade que ten a súa base nas aulas de teatro da Universidade e que serve para darlles visibilidade”, salienta o director de área adxunto á Vicerreitoría, Luis Torres, que lembra que unha das montaxes é o resultado final do traballo realizado ao longo do curso na propia aula do campus, na que tanto estudantado como persoas alleas á comunidade universitaria iniciáronse no proceso de preparación dunha montaxe teatral. Trátase, como engade, dunha “actividade que tivo moita aceptación” e que tiña á fronte ao responsable de Teatro de Ningures, Salvador del Río, encargado tamén de coordinar unha mostra que recupera neste 2023 o seu carácter internacional da man da Universidade do Minho. Como apunta Torres, a súa participación constitúe o primeiro resultado “dunha liña de colaboración a nivel cultural, que contamos que terá continuidade”.
Promover a mobilidade internacional do estudantado, desenvolver proxectos de investigación que contribúan ao desenvolvemento social e económico da provincia e dar impulso ao proxecto de especialización Campus Crea. Estes son os eixes dos tres convenios cos que, como anunciou este mércores, a Deputación de Pontevedra “reforza a súa colaboración” coa Universidade de Vigo e aos que destina un total de 210.000 euros.
Destes fondos, 80.000 euros dedicaranse á posta en marcha dun programa de axudas para o desenvolvemento de proxectos de investigación en diferentes ámbitos, mentres que outros 100.000 destinaranse a promover a mobilidade do alumnado que participa en programas como o Erasmus+. Finalmente, o ente provincial achegará tamén 30.000 euros ao Campus Crea, para a realización conxunta de eventos culturais ou deportivos e de proxectos con entidades empresariais. Segundo destacou a presidenta da Deputación, Carmela Silva, o obxectivo destes acordos é “fomentar o coñecemento, favorecer unha mellor atención ao alumnado e á investigación” e tamén a “grandes proxectos que permiten referenciar á Universidade", como o Campus Crea.
As obras de dez antigos alumnos e alumnas da Facultade de Belas Artes, que a día de hoxe son profesionais da banda deseñada e da ilustración, reúnense na Sala Universitaria Profesor Manuel Moldes, que este venres acollía a inauguración da exposición 9 narrativas gráficas e unha animación desesperada. Comisariada polo autor e editor de cómics Kiko da Silva, esta mostra permite achegarse ao traballo realizado no ámbito da banda deseñada por Brais Rodríguez, Jano, José Domingo, Julia Lago, Martín Romero, Miguel Cuba, Miguel Porto e Miguel Iglesias, así como polo propio comisario. A exposición, que poderá visitarse ata o 29 de xuño e que conta coa colaboración do Concello de Pontevedra, presenta tamén unha animación e unha serie de bocexos que o tamén exalumno e gañador de catro premios Goya Alberto Vázquez realizou para o seu filme de animación Psiconautas.
“Que, por primeira vez, teñamos a sorte de traer banda deseñada á facultade creo que non é simplemente un feito momentáneo, creo que é un cambio”, salientou Da Silva neste acto, no que lembrou que ao cómic “custoulle moito ser recoñecido dentro do que é o ámbito artístico”. De aí que definise como un “acto de xustiza” a idea do novo coordinador da sala, Ignacio Pérez-Jofre, de dedicar unha exposición a creadores de banda deseñada formados na facultade. A través das obras dunha serie de artistas de diferentes xeracións, a exposición achega “unha pequena pincelada” do que representa na actualidade o panorama da banda deseñada en Galicia. Neste punto, Da Silva incidiu en como a ausencia dunha industria do cómic na comunidade e a formación en Belas Artes de boa parte dos seus profesionais contribúen a que na banda deseñada galega convivan “gran cantidade de estéticas e de procesos creativos”, reflectidos tamén nesta exposición.
Definido pola Real Academia Galega (RAG), da que foi presidente entre 1997 e 2001, como “un dos fundadores do galeguismo progresista”, Francisco Fernández del Riego desenvolveu un extenso labor intelectual, cultural e político nunha Galicia marcada pola ditadura franquista. A traxectoria no “exilio interior” do escritor homenaxeado neste 2023 no Día das Letras Galegas centrou na tarde deste mércores o acto conmemorativo promovido pola Vicerreitoría do campus, no que o tamén expresidente da RAG Xesús Alonso Montero afondou no labor político e literario do que fora un dos impulsores da editorial Galaxia e director da revista Grial. Ademais de para rememorar a súa figura, este evento serviu tamén para coñecer as creacións premiadas na terceira edición do certame Múltiples olladas ao redor das Letras Galegas, no que se convidaba ao alumnado a reinterpretar a obra de escritor homenaxeado e dar forma a creacións en múltiples disciplinas que tivesen como inspiración a súa traxectoria e produción literaria.
Dúas alumnas da Facultade de Ciencias da Educación e do Deporte, Macarena Gisellle Volluz e Laura Chaves, resultaron gañadoras dos dous premios, cunha dotación económica de 300 e 250 euros, outorgados nesta edición e que foron entregados no marco deste acto, que abriron as intervencións do reitor, Manuel Reigosa, e da vicerreitora do campus, Eva María Lantarón. Tras unha apertura na que se puxo o foco en que contribuír á preservación e promoción da lingua e da cultura galega é unha das misións fundamentais da Universidade, a profesora da Facultade de Ciencias da Educación e do Deporte Ana Acuña foi a encargada de presentar a Alonso Montero. Catedrático de Literatura Galega, membro da RAG e do Consello da Cultura Galega, o compromiso coa defensa do idioma de Alonso Montero e do propio Fernández del Riego foi outra das cuestións postas sobre a mesa nun acto que afondou no labor desenvolvido durante a ditadura por Fernández del Riego, quen en 1992 convertirase no primeiro doutor honoris causa na historia da Universidade de Vigo.
“A idea orixinaria da Unión Europea non hoxe é menos necesaria que antes. Outra cousa é como se está a executar na práctica”, sostivo o profesor ad honorem da Universidade de Santiago de Compostela Antonio Carlos Pereira Menaut na conferencia que este martes impartía na sede da Vicerreitoría do campus con motivo do Día de Europa. Co gallo desta conmemoración, a Cátedra Jean Monnet Institucións Europeas e Cidadáns, que dirixe o profesor da Facultade de Dirección e Xestión Pública Celso Cancela, promoveu un coloquio con este catedrático de Dereito Constitucional, que puxo o foco tanto na traxectoria da UE como no seu futuro, mais tamén no propio momento que atravesa.
De feito, Pereira Menaut buscou en primeiro termo xerar unha reflexión “sobre a situación actual" da UE, nunha conferencia titulada A Unión Europea: entre o federalismo e o populismo, que foi presentada por Cancela e que puido seguirse tamén de xeito virtual, a través das plataformas da Federación Galega de Asociacións Universitarias Sénior (Fegaus). Este coloquio forma parte das actividades dunha cátedra financiada pola Comisión Europea que pon o foco nos efectos da dixitalización na UE, na que se insire tamén o obradoiro sobre a UE que este luns levou á Facultade de Dirección e Xestión Pública ao secretario técnico da AECT Río Miño, Lois Pérez Castrillo.
Saúde, comunicación, deseño, recursos naturais, gobernanza e pedagoxía na profesionalización docente. Cando menos dúas destas seis liñas de investigación específicas do Campus Crea deberán combinarse nos traballos ou accións desenvolvidos que opten aos III Premios CREA-Creatividade e Innovación, uns galardóns dirixidos a promover o traballo interdisciplinar do alumnado, nos que se repartirán 3000 euros en premios. Ata o 28 de xullo permanece aberto o prazo de presentación de traballos a estes premios promovidos pola Vicerreitoría e o Campus Crea, enmarcados, como recolle a súa convocatoria, na “política de impulso e fomento do proxecto de especialización” do campus pontevedrés.
Abertos a múltiples tipos de propostas, “a principal condición para poder participar neste premios é que os traballos reúnan liñas de investigación distintas e complementarias”, salienta a directora de área do Campus de Especialización Crea, Ana Belén Fernández Souto. Nese senso, sinala, o principal propósito destes galardóns é pór en valor “as investigacións interdisciplinares que se desenvolven no campus" e que conectan directamente “coa cultura do Campus Crea, que pretende xerar sinerxías entre as distintas titulacións e os diferentes investigadores e grupos e promover accións, investigacións e estudos que sexan interdisciplinares”.
Nomeado comisario provincial da Policía Nacional en Pontevedra o pasado verán, Juan José Díaz Jiménez mantiña nas súas últimas horas o seu primeiro encontro institucional coa vicerreitora do campus de Pontevedra, Eva María Lantarón, dirixido a explorar posibles vías de colaboración entre a UVigo e a Comisaría Provincial da Policía Nacional. “Veño sobre todo a presentarme oficialmente e a pór a comisaría a disposición da Universidade”, salientou Díaz dunha xuntanza dirixida a explorar “canles de comunicación e colaboración” coa institución académica. “Traballar con diferentes institucións sempre é positivo e contribúe á apertura da Universidade á sociedade”, engadiu Lantarón, que destacou o interese da institución académica por “establecer liñas de colaboración” coa comisaría.
Nese senso, a vicerreitora lembrou que aínda que “pode que non sexan especificamente os das titulacións do campus”, si existen ámbitos de traballo na UVigo que poderían “establecer sinerxías” coas institucións policiais, “xa sexa para a realización de cursos ou para realizar incluso actividades de investigación”. Nesa mesma liña, o comisario provincial sinalou que aínda que no caso de Pontevedra aínda está por desenvolver “noutras comisarías colabórase moito coa universidade”, con iniciativas como cursos e accións formativas ou na organización de visitas ás instalacións e laboratorios científicos. Díaz Jiménez apuntou tamén outras posibles vías de colaboración como a organización de “charlas informativas e de prevención” sobre cuestións como os ciberdelitos, á vez que puxo de relevo a importancia de “abrir a policía á sociedade”.
A vella aspiración da Universidade de Vigo de contar cunha única Facultade de Enfermaría que dea acubillo ás tres escolas públicas adscritas actuais (Pontevedra, Ourense e Meixoeiro, en Vigo) vai camiño de converterse en realidade. Tras a aprobación da memoria de creación do novo centro no Claustro da pasada semana, este xoves o reitor da UVigo, Manuel Reigosa, mantivo unha xuntanza coa presidenta da Deputación de Pontevedra, Carmela Silva, e co director da escola, Miguel Ángel Piñón, para avanzar no proceso que implicará a desvinculación da actual Escola de Enfermería de Pontevedra respecto da Deputación e pasar a formar parte da futura facultade, que nacerá como centro propio da UVigo e contará con tres sedes, unha en cada campus.
Este proceso arranca, como explicaba o reitor, “tras varios anos de negociación” coas tres escolas, as consellerías de Sanidade e de Cultura, Educación e Ordenación Universitaria e a Deputación de Pontevedra. O obxectivo temporal é que a facultade bote a andar no curso 2024/2025 e impartirá de forma descentralizada nos tres campus o Grao en Enfermaría, así como o futuro mestrado, cuxa declaración de interese foi aprobada en Consello de Goberno do pasado mes de xaneiro. Ademais, como adiantou o reitor, traballarase dende a Universidade para dotar o centro tamén dun programa de doutoramento. “Será algo bo para todo o país, especialmente para o sur de Galicia”, subliñaba Reigosa.
Os procesos de innovación na economía circular, a arqueoloxía da arquitectura e o uso dos procedementos téxtiles tradicionais na creación artística centran os tres novos cursos de Extensión Universitaria promovidos a pola Vicerreitoría do campus para os próximos meses. Abertos a toda a cidadanía, desde esta semana permanece aberta a inscrición nesta programación, que se completa cunha nova edición dun seminario que analiza diferentes estratexias márketing e comunicación empresarial a través das experiencias dunha serie de profesionais. “Trátase dunha programación formativa aberta a toda a cidadanía, que ademais de complementar a formación do estudantado de diferentes titulacións, contribúe a achegar a Universidade á sociedade”, sinala a vicerreitora do campus, Eva María Lantarón, respecto dunha serie de actividades que buscan tamén "levar á formación máis aló do curso académico”. De feito, os antigamente coñecidos como cursos de verán esténdese neste 2023 no campus pontevedrés de maio ata outubro, con catro seminarios que ofertan no seu conxunto un total de 100 prazas.
Nesta programación insírense, por unha banda, tres cursos de 30 horas, con taxas de matrícula queoscilan entre os 25 e os 50 euros, ás que se aplica un desconto do 35% ou do 20% para os diferentes colectivos vinculados á UVigo. Nestes tres casos, a inscrición permanecerá aberta ata que se cubran as prazas ou ata 15 días naturais antes da data de inicio. Por outra banda, esta oferta formativa complétase cun curso de 60 horas sobre economía circular, no que a inscrición pechará o 10 de maio e que terá un prezo de matrícula de 100 euros, tamén con diferentes descontos para os colectivos vinculados á Universidade.