Debido ao carácter contaminante de algúns dos seus compoñentes, os aparatos eléctricos e electrónicos non poden rematar a súa vida útil nun colector, senón que deben ser entregados a un xestor autorizado na xestión deste tipo de residuos. Coa idea contribuír á concienciación da comunidade universitaria respecto desta cuestión e promover á vez un adecuado tratamento destes aparellos, a Vicerreitoría do campus promove a XVI edición da Semana de Recollida de RAEE´S (residuos de aparellos eléctricos e electrónicos), que se desenvolverá entre o luns 24 e o venres 28 de abril.
Ao longo da vindeira semana, as diferentes facultades e escolas do campus, a sede da Vicerreitoría e o Pavillón Universitario contarán cun punto de recollida onde as e os integrantes da comunidade universitaria poderán depositar ordenadores, teléfonos móbiles, electrodomésticos e outra serie de aparellos que funcionen con pilas ou baterías. “Trátase da segunda edición desta actividade que realizamos neste curso e o funcionamento mantense igual que sempre”, salienta o director de área adxunto á Vicerreitoría, Luis Torres, que incide en que o principal propósito desta iniciativa é “contribuír á concienciación ambiental” da comunidade universitaria. Os aparellos que se reúnan nos diferentes puntos de recollida, nos que non se poderán depositar nin lámpadas nin baterías, serán trasladados posteriormente a un xestor autorizado para o tratamento deste tipo de residuos.
Dar visibilidade ao proxecto de especialización do campus pontevedrés é o propósito central da Semana da Creatividade e da Innovación, un programa de actividades promovido polo Campus Crea, que nos próximos días se desenvolverá nas diferentes facultades e escolas. Gratuítas e abertas ao público, esta serie de conferencias, talleres e actividades culturais conflúe á súa vez coa programación de Culturkata, impulsada pola Facultade de Comunicación. Coa creatividade como fío condutor dunha vintena de propostas, este centro acolleu a apertura conxunta destas dúas iniciativas, que arrancaron coa presentación dunha exposición de carteis de produtos innovadores deseñados polo alumnado e cun relatorio sobre innovación tecnolóxica.
“Nesta Semana da Creatividade e da Innovación o que pretendemos é dar visibilidade ao noso campus de especialización”, salientou a vicerreitora Eva María Lantarón, responsable de inaugurar estas xornadas xunto coa decana, Emma Torres. Ademais de presentar as diferentes iniciativas que engloba esta programación, Lantarón lembrou que o Campus Crea atópase actualmente iniciando os traballos para a súa acreditación, polo que o feito de que o proxecto de especialización “teña unha repercusión tanto a nivel académico como social é para nós moi importante”. Con esta programación a Vicerreitoría celebra cada ano, lembrou, o Día Internacional da Creatividade e da Innovación, que se conmemora o 21 de abril e que é tamén unha das data en torno ás que se articula a Semana da Creatividade Culturkata, xunto co día da súa patroa desta facultade, Santa Catarina de Siena, o vindeiro venres 28. “Para nós é moi importante conmemorar esta Semana da Creatividade, que é a nosa esencia de traballo”, sinalou Emma Torres respecto dunha programación coa que buscan tamén “manter o contacto co noso antigo alumnado”, a través de actividades protagonizadas por profesionais formados no centro.
“Estimular a creatividade e a innovación entre o alumnado da Universidade de Vigo a partir da revisión, reflexión e análise da produción cultural de Francisco Fernández del Riego” é, como recolle a súa convocatoria, o principal obxectivo do terceiro premio Múltiples olladas ao redor das Letras Galegas, co que a Vicerreitoría do campus quere sumarse á conmemoración, o vindeiro mes de maio, do Día das Letras Galegas. Aberto á participación de todo o alumnado da UVigo, este certame propón que a produción cultural do escritor e ensaísta homenaxeado no presente ano sirva como inspiración para a creación dun “produto cultural ou tecnolóxico de diferente índole”. Nese senso, trátase dun certame na que o alumnado participante terá “liberdade e técnica e artística” para desenvolver todo tipo de obras inspiradas no traballo de Fernández del Riego, promovendo deste xeito que a súa produción literaria sirva como punto de partida para a creación de ilustracións, cómics, fotografías, infografías, pezas escultóricas, composicións musicais ou pezas audiovisuais.
“A pretensión fundamental é potenciar unha mirada da obra” deste ensaísta e escritor “desde outras concepcións artísticas, códigos e soportes”, recolle a resolución reitoral pola que se convoca a terceira edición deste premio, que a Vicerreitoría dedica cada ano á produción literaria do autor ou autora homenaxeado no Día das Letras Galegas. Ata o 4 de maio permanece aberto o prazo de presentación de traballos a un certame que busca “promover a creatividade do alumnado” e achegalos “ao personaxe homenaxeado no Día das Letras Galegas”, como salienta o director de área adxunto á Vicerreitoría, Luis Torres. De aí que destaque o positivo de dar continuidade a unha iniciativa que contribúe a que o estudantado indague “e faga a súa propia interpretación” da obra e traxectoria de Fernández Del Riego, que en 1992 se convertía no primeiro doutor honoris causa na historia da Universidade de Vigo. Escritor, intelectual e político, na traxectoria do autor homenaxeado neste 2023 destacan tanto os seus ensaios sobre a cultura e a literatura galegas, xunto á súa obra narrativa, ademais ter sido un dos impulsores da editorial Galaxia, director da revista Grial ou presidente da Real Academia Galega entre 1997 e 2001.
Coincidindo coa conmemoración, o 21 de abril, do Día Internacional da Creatividade e da Innovación, o campus de Pontevedra busca pór en valor o fío condutor do seu proxecto de especialización, a creatividade, cun conxunto de actividades gratuítas e abertas a toda a cidadanía. Entre o mércores 19 e o venres 28, as diferentes facultades e escolas acollerán unha serie de conferencias, talleres e xornadas, no marco da Semana da Creatividade e da Innovación. Trátase dun conxunto de propostas que buscan pór de relevo “os vínculos que hai entre os distintos graos, mestrados e doutoramentos do campus, a través de actividades que propoñen distintos enfoques da creatividade”, sinala a directora de área do Campus de Especialización Crea, Ana Belén Fernández Souto.
“Trátase de actividades que vinculan a innovación, a creatividade e a imaxinación desde distintos puntos de vista e que poden ser moi enriquecedoras para calquera persoa”, engade Fernández Souto da programación promovida polo Campus Crea. Nese senso, esta Semana da Creatividade e da Innovación contará, entre outros, coa participación do creativo publicitario Toni Segarra, que a revista Forbes situou entre as 25 persoas máis influentes de España; do fundador do Museo de Ideas e Inventos de Barcelona, Pep Torres; e da cineasta Ángeles Huerta, directora da película máis galardoada na última edición dos Premios Mestre Mateo, O Corpo Aberto.
Co obxectivo de pór en valor o fío condutor do seu proxecto de especialización, o campus conmemorará a finais de abril a Semana da Creatividade cun conxunto de actividades nas que insiren dúas propostas que, desde diferentes perspectivas, poñen o foco no que supón a idea de creatividade. No marco dunha programación que se presentará nas próximas semanas, o Campus Crea impulsa o obradoiro O cuarto azul, no que a actriz Helen Bertels levará ás persoas participantes a descubrir a súa “forza creativa innata”, explica, a través dun conxunto de actividades. Con sesións virtuais e presenciais, trátase dun curso aberto a toda a cidadanía, que cubrirá as súas 15 prazas por orde de inscrición, a cal pode realizarse desde esta xornada a través do correo
“No obradoiro de creatividade O cuarto azul pretendemos descubrir a nosa forza creativa innata, que pon luz no noso saber e nos impulsa á acción”, sinala a actriz, artista e escritora Helen Bertels no texto de presentación do taller que impartirá no campus nas próximas semanas. A través de sesións de traballo individual que se desenvolverán de xeito virtual, e outras de traballo en grupo, que terán lugar na Facultade de Fisioterapia, este obradoiro busca amosar as e os participantes que “todos somos creativos a diario en cada momento das nosas vidas”, promovendo unha reflexión sobre como as persoas restrinxen a súa propia creatividade a través da atención, a meditación e a arte, traballando con disciplinas como o colaxe. “Haberá moitas tarefas entretidas coas que experimentar e descubrirse”, engade o texto de presentación dun obradoiro no que se proporán actividades como paseos pola natureza, a realización de fotografías ou o uso dunha liberta para anotar ideas.
Ata o vindeiro mércores 5 de abril permanece aberto, segundo o calendario fixado pola Xunta de Galicia, o período de preinscrición na Escola Infantil do campus de Pontevedra, que contará o vindeiro curso con 28 prazas para alumnado de novo ingreso, das que se reserva unha porcentaxe para os fillos e fillas do persoal e alumnado da Universidade de Vigo. No próximo curso, o centro contará con catro aulas e un total de 58 prazas, de tal xeito que, no caso de formalizarse a renovación de todo o alumnado actual, contará con 7 vacantes no grupo de 0-1 anos, outras 6 no de 1-2 e 15 nas aulas de 2-3.
Como explica a directora da escola, Ángeles Rodríguez, as inscricións "poden realizarse tanto de xeito virtual, a través da sede electrónica da Xunta, segundo o modelo BS404A, como de xeito presencial na escola”. De feito, no caso das e os integrantes da comunidade universitaria, destaca, “é preferible” que realicen esta inscrición de no propio centro, xa que a súa solicitude adscribiríase “á cota reservada á Universidade”. No caso de que algunha destas prazas quedase baleira, adxudicaríase “no baremo extraordinario de setembro”, engade. Por outra banda, no caso dos nenos e nenas nacidos unha vez rematado o prazo de preinscrición, será posible presentar estas solicitudes despois do 5 de abril e antes da publicación das listas definitivas de admitidos e excluídos.
Un percorrido pola tradición musical galega, no que houbo espazo para pasodobres, xotas, muiñeiras, coplas ou carballesas, da man de Pepe Vaamonde Grupo, As Cantigas de Elena e a Aula Permanente de Música Tradicional. Esta foi a proposta que a Vicerreitoría do campus despregou na noite deste xoves nos Teatro Principal, nunha nova edición do Concerto de Primavera, que tivo como principal protagonista á formación liderada polo compositor, gaiteiro e frautista Pepe Vaamonde. Nun evento organizado coa colaboración do Concello de Pontevedra, esta formación presentou o seu espectáculo O mellor dos catro elementos, no que propoñen un percorrido polos catro traballos discográficos que editaron ao longo de máis de dúas décadas de traxectoria musical.
A través da combinación de pezas instrumentais de composición propia e cancións tradicionais, a banda que integran Vaamonde, o guitarrista Pipo Alvariño, o baixista Jesús Vidal, o percusionista Miguel Anxo López e a acordeonista Miryam González repasaron algúns dos temas reunidos en catro traballos que, como explicou Vaamonde, naceron da “idea peregrina de dedicar cada disco a un dos catro elementos”. Auga, vento, terra e lume foron nese senso os fíos condutores, respectivamente, de Aviouga (2002), Onde nace o vento (2005), Introterra (2009) e Nas Pedras do Lar (2015), discos que repasaron nunha actuación na que tamén estrearon dúas composicións que formarán parte do seu próximo traballo.
No marco dos traballos para acadar a acreditación do Campus Crea como campus de especialización, a sede da Vicerreitoría acolleu este luns as reunións constitutivas de dous comités consultivos que prestarán un asesoramento externo a este proceso, un integrado por expertos e expertas de diferentes universidades e outro composto por representantes de diferentes institucións, entidades e colectivos profesionais. “Permitirannos ter unha perspectiva externa de como acometer melloras ou implantalas dentro do campus de especialización, nun caso desde un punto de vista máis científico e noutro, máis enfocado ao que o mercado laboral necesita das persoas egresadas do campus de Pontevedra”, salienta a directora de Área do Campus de Especialización Crea, Ana Belén Fernández Souto.
Nunha serie de xuntanzas que combinaron o seguimento virtual coa asistencia presencial, o Consello Reitor do Campus Crea, do que forman parte os decanos e decanas dos diferentes centros, aprobou a composición definitiva tanto do comité consultivo social-empresarial como do comité consultivo académico, xa que ambos incorporan unha serie de novos membros aos xa aprobados en decembro de 2019. “Para o proceso de acreditación é importante ter estes dous comités funcionando”, apuntou o reitor, Manuel Reigosa, que lembrou que dotarse destes órganos de asesoramento é un requisito “fundamental” para acadar o recoñecemento como campus de especialización por parte da Xunta de Galicia. Nese senso, o encontro deste luns, engadiu a vicerreitora do campus, Eva María Lantarón, tiña como obxecto presentarlles os eixes centrais do Campus Crea, nunha primeira xuntanza que posteriormente permita contar “coas súas opinións como expertos externos”.
Un percorrido polos seus máis de 20 anos de traxectoria e os seus catro traballos discográficos. Isto é o que propón Pepe Vaamonde Grupo co seu espectáculo O mellor dos catro Elementos, que o vindeiro xoves 23 centrará o Concerto de Primavera da Vicerreitoría do campus. Organizado coa colaboración do Concello de Pontevedra, terá lugar ás 21.00 horas no Teatro Principal e contará con entrada gratuíta, previa recollida dunha invitación nas conserxerías das diferentes facultades e escolas e da Casa das Campás. Ademais desta banda de folk, a actuación contará tamén coa participación das e dos integrantes da Aula Permanente de Música Tradicional do campus e da cantareira pontevedresa María Vidal.
Como lembra o director de área adxunto á Vicerreitoría, Luis Torres, este Concerto de Primavera insírese “nas actividades de extensión universitaria que se ofrecen ao conxunto da cidadanía” e á súa vez constitúe “un acicate” para as persoas que participan na aula permanente, “xa que ter a posibilidade de tocar con grupos de renome sempre supón un aliciente”. Nese senso, boa parte das persoas participantes nunha actividade formativa que reúne neste curso 46 persoas abrirán e pecharán este recital xunto á formación que encabeza o compositor, gaiteiro e frautista Pepe Vaamonde.